Natomi inatsisaatsuliorneri allat pillugit saqqummertoqarpoq

Kosovomi naalakkersuisut siulittaasuat Natomi nalunaarsukkani pinerliiniaqatigiit akornanni pissaanilittut taaneqartoq, maannakkut inatsisaatsuliorneri allat pillugit saqqummertoqarpoq. Taanna tigusat erlaviinik tuniniaasarsimanernut akisussaatillugu Europarådimi oqallisigineqaleruttortoq, pinerliiniaqatigiit akornanni pissaanilittut uppernarsaatit saqqummiunneqarput.
januaarip 25-at 2011 17:24

Tuluit aviisiata The Guardianip pappiaqqat isertuussat 2004-meersut pissarsiarisimavai. Taakkunani atuarneqarsinnaavoq Hachim Sachi Kosovomilu inatsisartut nuimasut pinerliiniaqatigiinnut ilaallutik atortittartunut kiisalu sakkunik ikiaroornartunillu eqqussuisarnernut tunngasunik pinerluuteqarsimasut. Pappiaqqat Wikileaksimeersuunngillat, KFOR-imilli naqissuserneqarsimammata Kosovomi amerikamiut sakkutooqarfianniit pissarsiarineqarsimassangatinneqarput. Kosovomi qullersat saqqummiunneqartut, tusatsiakkat aallaavigalugit pisimasullu allanngortillugit Serbiamiut nalunaarsuinerat naapertorlugu unnerluutasut oqaatigaat. Nunalli killiit Hachim Sachip pinerliiniaqatigiinnut ilaanera sivisuumik pasitsaassimaarsimavaat. Qaammatip ataatsip matuma siorna Europarådimut nalunaarusiortartup, Dick Martyp saqqummiussai naapertorlugit, serbiamiut tigusat Kosovomiit Albaniamukaallugit tamaani toqoriarlugit erlaviisa, soorlu tartuisa tuniniarneqartarsimanerinut Hachim Sachi akisussaasuuvoq.

Takunnissimasunik uppernarsaasinnaasoqartoq Dick Martyp Strasbourgimi oqaatigaa, taakkualu pingaruteqartupilussuupput. Europarådimut nalunaarusiami atinik allassimasoqanngilaq, uppernarsaasussat akiniarneqarnissaat annilanngatigineqarmat saqqummiussassaallu apeqquserneqarsinnaasussaanngimmata. Albaniamiut Dick Martymik ikiuisimasut tamarmik aqqi saqqummiunniarlugit Hachim Sachi juullilersoq qunusaarimmat, pisut qanoq najummassimanartiginerat paasineqarsinnaavoq.

Kosovomi qullersat unnerluussisunit nunanit tamaneersunit misissuiffigineqassanersut, Europarådimi ullumi taasissutigisussaavaat.