Nato: Ukraine russinut ajugaasinnaavoq
Naak russit sakkussiarissaartut Ukarainemut saassussigaluartut, tassanilu innuttaasunut suussuteqanngitsunut sakkortuuliorfiginnikkaluartut Ukrainemiut russinut ajugaasinnaasut, NATO-p qullersaa Jens Stoltenberg naliliivoq.
- Russit ajorsartitaasinnaapput Ukranemiummi nunartik sapiitsuliorlutik illersortuarpaat. Ukrainemiullu ikiorniarlugit nunat NATO-mut ilaasortaasut Ukraine sillimanissakkut iluaqutissanik milliardit koruunerpassuarnik nalilinnik pilersorpaat. Jens Stoltenberg oqarpoq.
Sakkussianik suli amerlanernik
Nunat NATO-mut ilaasortaasut Ukrainemiut sakkutuuinik tusindilinnik ukiut arlallit ingerlaneranni sungiusaasarput, maannalu nunat NATO-mut ilaasortaasut Ukrainemut sorsunnermi sakkussianik, soorlu ungasissumut eqqorniutinik aamma pilersuisut Stoltenberg uppernarsaavoq.
-Tamakkua tamarmik Ukrainep sorsunneranut ullut tamaasa iluaqutaapput, Stoltenberg nutaarsiassaqartitsivimmit Ritzaumit taama issuarneqarpoq.
Russit sorsunnerminni anguniakkaminnik angusaqanngitsoornerannut Ukrainemiut akersuunnerat, taassuma tikkuarpaa.
-Russit Ukrainemut sorsunnerat Moskvami pilersaarusiorneq malillugu ingerlanngilaq. Kyiv-imi tiguanngitsoorpaat Kharkiv-ilu qimallugu. Donbas-imi saassussinertik unitspaat. Putin-ip Ukraine ajugaaffigerusuppaa, Ukraineli suli atavoq, Jens Stoltenberg oqarpoq.
Taamaattoq Ukranimiut sakkussianik suli amerlanernik pisariaqartitsimmata nunat NATO-mut ilaasortaasut ikiuinertik annertusisariaqaraat Jens Stoltenberg erseqqissaavoq.
