NATO saassussisitsimmat danskit peqataapput

Sapaatip-akunnerata naanerani Afghanistanip kujataani sakkortuumik NATO-p saassussititsinerani danskit sakkutuui aamma peqataapput, akersuunnermilu Taliban-imiut ajorsartinneqarput.

NATO-miit tusarfik naapertorlugu ullut marluk atorlugit akersuunnermi Talibanimiut pikitsitsisui inuit 200-t missaat toqunneqarsimapput.

Nutaarsiassaqartitsiviup BBC-p nittartagaa naapertorlugu, NATO-mi sakkutuut Talibanerinut akiuuttut ilaatigut canadamiuupput, danskiullutik aammalu Hollandimiuullutik.

Sorsuuffimmi sakkutuut naalagaata uppernarsarpaa, danskit sakkutuui ilumut sorsuuteqataasimasut oqaatigiumanngilaali saassussinermi danskit saarlernut ilaasimanersut.

Akersuuttoqarneranili NATO-p sakkutuui aamma annaasaqarput, canadamiut sakkutuui sisamat toqutaapput sakkutuullu allat arfineq-marluk ikiligaasimallutik, ikiligaasulli sumiuunerat nalunaarutigineqarsimanngilaq.

Ippassaq tuluit timmisartuat nakkarmat tuluit sakkutuui 14-t toqupput.

NATO-p sakkutuui katillugit 2000-t missaanniittut Kandahar-imi akersuuterujussuartoqarnerani peqataasut oqaatigineqarpoq.