NATO-p qullersaa: Ukraine sakkussianik sakkortunernik nutaaliaanerusunillu tunineqarumaarpoq

Ukraine sakkussianik sakkortunernik nutaaliaanerusunillu tunineqarumaarpoq. Nunat killiit illersoqatigiiffiata NATO-p qullersaa Jens Stoltenberg, nunat aningaasarsiorfiunerpaat Schweizimi Davosimi ataasimeersuarneranni taama ilaatigut oqarpoq.

Ukraine pillugu ataatsimiittartoqatigiit sapaatit-akunnerata massuma ingerlanerani ataatsimiinnissaat sioqqullugu Stoltenberg taama nalunaaruteqarpoq.

Ataatsimiittartoqatigiit taakku nunat killiit Ukrainemut sakkussianik pilersuinerannik ataqatigiissaarisarput.

- Sakkussianik pilersuisoqarnerunissaa, sakkussianillu nutaaliaanerusunik pilersuisoqarnissaa sulissutigineqartoq pingaarnertut oqaatiginiarneqarpoq, sakkussiat sakkortunerit nutaaliaasullu, Jens Stoltenberg oqarpoq, nangillunilu:

- Pingaartitavummi pillugit aamma sorsuttoqarpoq, taanna oqarpoq.

AAMMA ATUARUK Nunat tamalaat: Ukrainemiut kiffaanngissuseqarlik!

Qamussuarnik sorsuutinik Leopard 2-nik taaneqartartunik tunniussisoqarniarnersoq, Stoltenbergip pingasunngornermi oqaatiginngilaa. Qamussuit pineqartut Ukrainemit piumaneqarput.

Ukrainemiulli sakkutuuisa sakkussianik pilersorneqarnissaannut pilertortumik pilersuisoqartariaqartoq Stoltenbergip erseqqissaatigaa, Ukrainemiummi sakkutuuisa russit sakkutuuinik tunuartitsiniarlutik sukataarput.

- Ruslandip sakkutuuisa ilimagisamit sukataannginnerunissaannik oqassalluni mianersuuttariaqarpoq, Stoltenberg oqarpoq.

Qamussuit sorsuutit Leopard 2-t Ukrainemut tunniunneqarnissaat piviusunngussappat Tyskland apeqqutaassaaq.

Qamussuimmi pineqartut Tysklandimi sananeqartarput, avammullu tunineqarsinnaanissaannut akuersissuteqarluni.

Qamussuit Ukrainemut tunniunneqassappata taamaammat Tyskland apeqqutaassaaq - naak assersuutigalugu NATO-mi nunamit allamit Ukrainemut tunniunneqassagaluarpata.