NATO islamimik upperisalinnik suleqateqarnerusariaqarsorineqarpoq

Nunat killiit Illersoqatigiiffiat, NATO, islamimik upperisalinnik suleqateqarnerusariaqarsorineqarpoq, NATO-mi qullersaq, Anders Fogh Rasmussen, atorfimmini nutaami siullermeerluni tusagassiortunik katersortitsinermini taama oqarpoq.
aggustip 03-at 2009 12:24

Anders Fogh Rasmussenip muslimit aallartitai Afrikap avannaaneersut aamma Kangia Qiterlermeersut ataatsimeeqatiserai.

- Nunat ataasiakkaat aallartitaat ataasiakkaarlugit inuttut naapeqatigerusuppakka, suleqatigiinneq qanoq nukittorsassanerlutigu eqqartoqatigiissutiginiassagatsigu, Anders Fogh Rasmussen oqarpoq. Politikenimi taama allaaserinnittoqarpoq.

Anders Fogh Rasmussen nutaarluinnarmik aamma iliuuseqarniarpoq, tassa NATO-mi nunat ilaasortaasut 28-t innuttaasa akornanni interneti aqqutigalugu NATO-p qanoq isumaqarfigineqarnera pillugu isumasiuisitsiniarami.

Iliuuseriniakkani NATO-p oqaluttuarisaanerani siuttup ammanerpaamik iliuuseriniagaatut piviusunngortinniakkani nammineq nalilerpaa.

Anders Fogh Rasmussenip nunat NATO-mi ilaasortaasut innuttai qanimut naapittarniarlugit aamma pilersaarutigaa, taamaaliorniarnermi katersortarfinni ataatsimiititsisarnissani siunniullugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq