NATO aamma Rusland akeqqersimaarpallaarunnaassapput

Bruxellesimi ullumikkut akeqqersimaartoqannginneruvoq. Tassami Ruslandip NATO-llu oqaloqatigeeqqittalernissartik siunniuppaat.
Allattoq Elisa Isaksen
marsip 05-at 2009 15:03

Ruslandip Georgiamut aasaq sorsuleraluarnera pissutigalugu NATO-p Rusland oqaloqatigiumajunnaaraluarpaa. Maannali illuatungeriit pisortatigoortumik ataatsimeeqatigeeqqittalissapput.

DR-ip ilanngutassiortuata Jakob Vinde Larsenip NATO-p Russinut akeqqersimaarunnarnera ima oqaatigaa:

NATO-p Rusland atorfissaqartippaa. Matumani peqqarniisaarnianut akiuiniarneq imaluunniit Afghanistanimi sorsunneq pineqarpata assigiimmik, ingammillu Iran pineqartillugu, tassami nunat killiit isumaqarmata Iran atomit atorlugit sakkussiorniartoq.

Iranilu tatineqarsinnaassappat, Rusland suleqatigineqartariaqarmat, Jakob Vinde Larsen oqarpoq.

Taanna aperineqarami maanna Rusland qaninnerusumik suleqatiginiarneqalissanersoq, akivoq, qularnanngitsumik Rusland suleqatiginiarneqalissasoq. Taamaattorli isumaqatigiinngissuteqartoqartassaaq, ingammik Georgiamut tunngatillugu. Kisianni NATO-mit oqaatigineqarpoq oqaloqatigiittoqarsinnaalernera pingaaruteqartoq, tassami oqaloqatigiissinnaaleraanni isumaqatigiinngissutigisat aamma oqaloqatigiissutigineqarsinnaalissammata. Aamma apriilimi ataatsimeeqatigiinnissaq pilersaarutaalereerpoq, Georgialu tassani oqaluuserineqassaaq.

Jakob Vinde Larsen aperineqarami NATO-p Rusland qaqugu attaveqarfigissaneraa, akivoq, NATO-p siuttui apriilip pingajuanni sisamaannilu Strasbourgimi ataatsimeersuareerpata, Russit pisortatigoortumik ataatsimeeqatigineqaqqittalissasut, Jakob Vinde Larsenip oqaatigaa.