Nationalbankip Naja Abelsen suleqatigiunnaarpaa
Naja Abelsen aningaasanik qaqqanik uumasunillu Kalaallit Nunaanneersunik assitalinnik tunniussinissaminut marlunngormat juunip ulluisa qulinganni piffissalerneqaraluarpoq.
Folketingip 2006-imi aalajangiuppaa, Kalaallit Nunaat namminerisaminik aningaasaqalissasoq. Folketingip inatsisiliaa siorna juunip aallaqqaataanili atuutileraluarpoq, aningaasalli pappialat suliariniarnerat sivitsuuttoorsimavoq.
Nationalbankip pisortaa, Torben Nielsen, tamatumunnga atatillugu oqarpoq, aningaaserivissuup Naja Abelsenillu suleqatigiinnerat taamaatinneqartoq. Tamatumalu kalaallit aningaasassaannut qanoq sunniuteqarnissaa oqaatigisinnaanagu.
Naja Abelsenip aaqqiissutaasinnaasumik nassaartoqarnissaa suli neriuutigaa, taamaalilluni aningaasat titartarnerat naammassisinnaaniassagamiuk.
- Suliassamut ilaajunnaartutut paasitinneqarpunga, tamannalu ajuusaarutigeqaara. Allatut aaqqiissutissamik siunnersuuteqarnissannut ataasinngorpamut piffissalerneqarpunga, Naja Abelsen oqarpoq.
Kalaallit aningaasaat atorneqalerunik Kalaallit Nunaanniinnaq atorneqarsinnaassapput.
