Nationalbankeni: Coronap ilungersunartorsiortitsinerata Kalaallit Nunaata ineriartornera unikkallartikkaa
Coronap ilungersunartorsiortitsilerneratigut piffiit nuannersut qaangiusimaarallarput. Ukiuni qassiiusuni aningaasaqarnikkut ineriartorneq akiitsut qaffakkiartornerannik pisortanilu aaqqissuusseqqinissamik pisariaqartitsinerulernermik taarserneqarput.
Danmarks Nationalbankip nunatta aningaasaqarneranik misissuinerani nutaami qulequttat ilaat tamakkuupput.
Ikiorsiissutinut aningaasartuutit, aalisarnermit akileraarutit appariartortut, ajornartoornermi timmisartuussinernut immikkut aningaasartuuteqarmat nunatta karsiata amigartoorutai 2020-mi 500 millionit koruuniulersinnaanissaat naatsorsuutigineqarpoq.
Imaanngilarli nunatta aningaasaqarnera ilungersunartorsiuleriartoq. Danmarks Nationalbankip allaffiani pisortap, Søren Bjerregaardip misissuinermi allaatiginnittut pingaarnerit ilagisaat oqarpoq.
Takornarialerinermit appariartoqarnera aningaasaqarnermut eqquisoq
Nunatsinni matusinerit angalanissamullu upernaat killilersuisoqarnera tunillatsissimasunik nunatsinnut isaasoqannginnissaanut iluaqutaavoq, taamaakkaluartorli coronap nunarsuaq tamakkerlugu tunillaassuunnera takornariaqarnermik suliaqarneramut eqquingaatsiarpoq.
Nunanut allanut timmisartukkut angalasut 2019-imi 93.000-it anguaat, ukioq mannalu septembarip qaammataa tikillugu 20.000-it sinneqalaaginnarlutik.
Takornariaqarnermik suliaqarnerup annaaneqarnera malugineqarsinnaavoq, Nationalbankenillu misissueqqissaarnera naapertorlugu tamanna nunatta avammut nioqquteqarnerata 2018-imut sanilliullugu 5 procentimik apparneranut pissutaasut pingaarnerit ilagaat.
- Ernumangaarnissaq pisariaqanngilaq. Pisortat aningaasartuutaannik qanoq iliornikkut aqutsisoqarsinnaanera inuiaqatigiinnullu atugarissaartitsisumik aningaasaliineq politikkikkut eqqortumik aalajangiinikkut iliuuseqarfigineqarsinnaapput, Søren Bjerregaard KNR-imut oqarpoq.
Siunissami sipaarnissaq pisariaqartoq
Siunissaq eqqarsaatigigaanni pisortani aningaasartuutit misissorluarnissaat pisariaqarpoq.
Nunarsuarmi kisiartangajaalluta nunatsinni pisortat inuinnarnit aningaasartuuteqarupput.
Nationalbankenilu allagaa naapertorlugu politikerit ukiut qulikkaat aggersut tamanna sianigissaiaqarpaat.
- Pisortat ingerlatsinerat qanoq ililluni angusaqarfiunerusinnaanersut suliakinnerulersinneqarsinnaanersullu maannamiit isiginiarneqartariaqarpoq. Maannakkorpiaq aallarnisaarneqartariaqanngilaq, siunissamili ungasinnerulaami tamanna pisariaqassaaq, Søren Bjerregaard oqarpoq.
Tamanna ukiuni aggersuni utoqqaqarneruleriartorneranik pissuteqarneruvoq. Taamaammat peqqinnissamut utoqqaallu isumagineqarnerannut aningaasartuutit qaffanngaatsiassapput. Aningaasaqarnermut Siunnersuisooqatigiit misissueqqissaaramikpisortat aningaasartuutaat isertitaannit ukiut qulikkaat marluk ingerlaneranni 1 milliardit koruuninik amerlanerulissasut erseqqissaatigaat.
Ilinniartitaaneq aqqutissaasoq
Nunatsinni sulisinnaasut pisariaqartinneqaqaat, Nationalbankenilu naapertorlugu ilinniartitaanikkut qaffaaniarneq unammillernartoqangaatsiarpoq.
Suliffissaaleqisut akornanni meeqqat atuarfiata kingornatigut ilinniagaqanngitsuni 2018-imi 9,3 procentiupput, inuussutissarsiutigalugulu ilinniagalinni 2,8 procentiusut ilinniarfinni ingerlaqqiffiusuni ilinniagaqartuni 0,5 procentiullutik.
- Tamanna nunatsinni ilinniartitaanerup qaffasissusaanik qaffaanissap aalajangiisuulluinnartumik unammillernartuuneranik takussutissiivoq. Ajornartorsiuterpassuit ilinniartitaanermut atassuteqarput, Søren Bjerregaard oqarpoq.
Aningaasaqarnermut naalakkersuisup, Vittus Qujaukitsup (NQ) misissueqqissaarneq ima oqaaseqarfigaa:
- Naalakkersuisut Nationalbankip inerniliineranut isumaqataapput. Bankip misissueqqissaarnera siunissami aningaasaqarnitsinnut aamma periarfissatut ilusiliatsinnut siulittuutigilluarpoq, naalakkersuisoq tusagassiuutinut nalunaarummi allappoq.
