Nathaliemi ujajaaneq: Pasisamik tigusaasoqarpoq
Nuummi Butik Nathaliemi ujajaanermut atatillugu Nuummi politiit pasisamik tigusarinnipput.
Allattoq Noah Mølgaard
Innuttaasut saaffiginnissutaat ilaatigut iluaqutigalugit tallimanngornerup arfininngornerullu akornanni Butik Nathaliemi ujajaasutut pasisamik Nuummi politiit tigusarinnipput.
- Tigusarineqartoq nassueruteqanngilaq. Ullup ingerlanerani maanna misissussavarput eqqartuussivimmut sassartinnissaannut naammattumik tunngavissaqarnerluta, Nuup politiivini pigaartuusoq Carl Sværd KNR.gl-mut oqarpoq.
Butik Nathaliemi ujajaaneq pivoq arfininngornerup tungaanut unnuami, angut kiinarpalik savissuarmik qunusaaraluni Butik Nathaliemi sulisut aningaasanik pappiaqqanik 40.000 koruunit missaannik tunniussitimmagit.