Nassuiaateqartoqarnissaa ataatsimiititaliap ujartorpaa
Kalaallit Nunaata silaannartaani angallannermi nunat tamat aalajangersagaasa naapertorlugit kiisalu inuit pisinnaatitaaffiinik ataqqinnittumik angallassisarneq pingaaruteqarluinnartikkitsik, ataatsimiititaliap oqariartuutigaa. Ataatsimiititaliap siulittaasua Thomas Kristensen, tusagassiutinut nalunaarummi taama allappoq.
Taamaammat pingaaruteqartutut isigaat Kalaallit Nunaat tamanna pillugu sukumiisumik nassuiaateqarfigineqarnissaa. Aalajangersakkammi nunanit tamanit akuerineqarnikut unioqqutillugit angallassisoqarsimassappat maannangaaq iliuuseqartoqartariaqarmat.
Arlaannaanulluunniit attuumassuseqanngitsunit misissuisoqarnissaa ataatsimiititaliap naalakkersuisunut piumasaraa. Piumasaqaat taanna Nunanut Allanut tunngassuteqartunut naalakkersuisumut Aleqa Hammondimut ataasinngorpat saqqummiunniarpaat.