Nassuiaat ilisimatuunit uitsatigineqarpoq
Suut tamarmik pileqqaarnerannik nassuiaat nutaaq ilisimatuunit nunarsuarmi tamaneersunit uitsatigineqarpoq. Nassuiaat taanna taaguuteqartinneqarpoq: Intelligent Design.
Uumasut naasullu, nassuiaat taanna malillugu, inerikkiartorsimasinnaanngillat, tupinnartuliortumilli pinngortinneqarsimassallutik.
Nassuiaat ima uitsatigineqartigaaq, allaat nunani 68-ini ilisimatuut suliniaqatigiffianni, Videnskabernes Selskabimi, ilaasortat, Intelligent Design akerliuffigalugu atsiorsimallutik.
Darwinip aapakaanik pinngortuunitsinnik oqarnera 1920-kkunni USA-mi upperniaqatigiit sakkortoorujussuarmik akerlilersorpaat. Taamanikkut eqqartuussivik angullugu upperniaqatigiit ajugaaniarput. Ilisimatuut nunani 68-ini massakkut tassunga assigusumik misigisisaqaqqipput. Akerlilersuineq USA-mi sakkortuneruvoq. Tamannalu pillugu ilisimatuut suliniaqatigiiffianni siulittaasoq Tom Fenchel ima oqarpoq.
- Upperisaq aalajangersimasoq tunngavilersuutigineqanngilaq, tupinnartuliortorli sunik tamanik pinngortitsisimasoq tunngavilersuutigineqarpoq, Tom Fenchel oqarpoq.
Tamanna tunngavigalugu nunani 68-ini ilisimatuut ilisimatuussutsikkut paasisarisimasatik tunngavilersuutigalugillu nassuiaammut akerliullutik atsioqatigiissimapput.
- Suut tamarmik ataatsimik pinngorfeqartut kialuunniit nalunngilaa Darwinillu misissuinerata takutippaa najugaqarfigisami avatangiisit aallaavigalugit suulluunniit tulluussartartut. Ilisimatuujusugut misissuinitsinni paasisagut imaapput; ulloriarsuit pisoqaanersaat ukiunik 4,6 milliardinik pisoqaassuseqarpoq ukiullu 3,8 milliardit matuma siorna uumasoqarnikuulluni. Tamakku tamaasa ilisimalereerlugit assortuinnarniarlugit assortuisoqarsinnaanngilaq. Assortuiniaraannimi biologiimi, fysikkimi nunalerinermilu ilikkagarisimasat aamma assortorneqalissapput, Tom Fenchel oqarpoq.
Taanna aperaarput sooq inuit ilisimatuut paasisimasaannut assortuisarnersut, ima akivoq:
- Inuppassuit miluumasuninngaanniit pinngorsimassallutik assut paqumigisarpaat. Tamannalu tunngavigalugu assortueqqajaasarnissaat ilimagaara, Tom Fenchel naggasiivoq.
