Nassiussat allakkallu kinguaattoorsinnaanerat Air Greenlandip ilimasaarutigigaa

Danmarkimit poortukkat allakkallu kinguaattoorsinnaasut, Air Greenland nalunaaruteqarpoq.
Air Greenlandip timmisartuutaani Norsami aliikkutassanut atortunik nutaanik marsip ulluisa 26-ata tungaanut ikkussuisussanngornera pissutaavoq. Assi © : KNR // Anton Gundersen Lihn
Allattoq Bikki P. Kleist
marsip 15-at 2019 12:14

Air Greenland Kangerlussuup Københavnillu akornanni nassiussanik ulluni tulliuttuni aqqanilinni assartuinikinnerulissaaq.

Air Greenlandip timmisartuutaani Norsami aliikkutassanut atortunik nutaanik marsip ulluisa 26-ata tungaanut ikkussuisussanngornera tamatumunnga pissutaavoq.
 
Ikkussuisoqarnissaanut atatillugu Air Greenland timmisartumik allamik attartorpoq, timmisartorlu ilaasunik amerlanerusunik ilaasoqarsinnaagaluarluni poortukkanut allakkanullu inissaqartitsinera annikinneruvoq, taamaattumik nassiussat kinguaattoorutigineqartussanngorput.

Silarlutsillugulu timmisartoq orsussamik atuinerusarmat tamanna nassiussanut sunniuteqassaaq kinguaattoortoqarsinnaassallunilu.

- Allakkanik nassiussanillu sullitatsinnut persaqusersuutaasinnaasut pillugit ajuusaarpugut, ullulli tamaasa allakkanik nassiussanillu nassarsinnaasatsinnik annertusaajuarnissaq sulissutigaarput, Air Greenlandimi, nassiussalerinermut pisortaq,  Tim Koop Jensen oqarpoq.