Nassiussassat tonsit arlallit Danmarkimi utaqqipput
Tele-Postip ilisimatitsinera naapertorlugu Post Danmarkip nalunaarutigaa Atlantikoq qulaallugu ullumikkut Kangerlussualiartoqarnerani nassiussat 3 tonsit missaat angallanneqartut.
apriilip 22-at 2010 10:03
Tamatuma saniatigut Nunatta Kitaanut Kujataanullu timmisartukkut nassiussassat 3,5 tonsit missaat suli Danmarkimiipput.
Post Danmarkimiilli ilisimatitsissutigineqarpoq nassiussanik assartuineq qaqugu nalinginnaasumik ingerlanneqalissanersoq oqaatigineqarsinnaanngikkallartoq.
Ippassaq Post Danmarkip poortukkat 1 tonsit missaaniittut timmisartukkut nassiussassaagaluit umiarsuakkut Damnarkimiit Nuummut nassiuppaat, apriilip 28-ni tikissangatinneqartut.
Assartuinikkut pissutsit sapaatip-akunnerata uuma naanerata kingornagut iluarsinissaat neriuutigineqartoq, Tele-Post ilisimatitsivoq.
