Nassiussanik angallassinermut kisermaassisussaatitaanerup allanngortinneqarnissaa pilersaarutigineqanngilaq
Siumup politikkikkut oqaaseqartartua assartuussineq tamatumunngalu akigitinneqartut pillugit Naalakkersuisunut § 37 naapertorlugu apeqquteqarpoq.
Nunatta avataanit imaatigut pilersorneqarnerani kisermaassinerup allanngortinneqarnissaanik Naalakkersuisut pilersaaruteqarnersut umiarsuarmillu angallassisarnerup iluani unammilleqatigiinnerup eqqunneqarnissaanik Naalakkersuisut pilersaaruteqarnersut apeqqutigaa.
Peqqissutsimut Attaveqarnermullu Naalakkersuisoq Steen Lynge § 37 naapertorlugu apeqquteqaatinut akissuteqarluni allappoq, Royal Arctic Line A/S-ip kisermaassilluni ingerlatsineranik allanngortitsinissamik Naalakkersuisut maannakkut pilersaaruteqanngitsut.
Isumaqatigiissut ersoqatigiinnermik nunap tamakkerluni pilersorneqarnissaanik qulakkeerisumik tunngaveqarpoq. RAL kisermaassisuugaluarluni illoqarfinnik pilersuinissamik pisussaaffeqarpoq.
Naalakkersuisullu nassiussanik angallassinermut kisermaassisussaatitaanerup allanngortinneqarnissaanik pilersaaruteqarnersut apeqqutigineqarmat, Steen Lynge ima akivoq:
- RAL-imik isumaqatigiissummi tikitassanut ilaasut akornanni, nassiussanik angallassinermi unammilleqatigiinermik eqqussinissamik pilersaartoqanngikkallarpoq. RAL-ip angallaviinit imminut akilersinnaasunit soorlu Aalborgimiit Nuummut isertitaanit- illoqarfiit niuernermi atugassarititaasut naapertorlugit angallavigineri imminut akilersinnaanngitsut aningaasalersorneqarput. Unammilleqatigiinnerup annertusineqarneragut iluanaaruteqarnissamut tunngavissaq annikillisinneqarpat, illoqarfiit taakku pilersorneqarnerisa qajannarsisinneqarneranik kinguneqassaaq, tamannalu nuna tamakkerlugu pissutsinik equsoortitsissaaq, Steen Lynge oqarpoq.
Tamatumunnga taarsiullugu Naalakkersuisut RAL suleqatigalugu suliffeqarfiup ingerlatsinerata pitsanngorsaavigineqartuarnissaa qulakkeerniarpaat. Naalakkersuisulli RAL-ip isumaqatigiissummi pisinnaatitaaffiinnik atuinerata, Kalaallit Nunaannut tunngatillugu pisussaaffiit nunarsuaq tamakkerlugu isumaqatigiissutit inatsisillu kunngeqarfiup Danmarkip umiartorneq pillugu isumaqatigiissutaanut inatsisillu attuumassuteqartut ataqqillugit, ingerlanneqarnissaa ilisimaaraat.
