Nassiussalerinermi aaqqissueriaaseq nutaaq kinguaattoortitserujussartoq
Juullimut ukioq manna tunissutissat piffissaq eqqorlugu apuuffissaminnut apuutinngitsoornissaat ernumagigukku, taava kisimiinngilatit. Poortukkat allakkallu kinguaattooqqarujussuarnerat nuna tamakkerlugu sumiiffinnit arlalinnit nalunaarutigineqarpoq.
Nuna tamakkerlugu nassiussanik isumaginninnerup piffissap ingerlanerani pitsaanerulernissaa ersarinnerunissaalu siunertaralugu, nassiussanik isumaginneriaaseq nutaaq septembarip pingajuanniilli atuutilersinneqarsimasoq, Air Greenlandip kinguaattoornermut pissutaanerarpaa.
Maannamulli allannguineq killormut sunniuteqaannarpoq.
- Timmisartut inissaqartitsiniarnerat unamminiarnartunut pissutaanngilaq, poortukkalli allakkallu mittarfiit akornanni ingerlateqqinneqartarnerat pissutaanerulluni nassiussat apuunnissaata tungaannut piffissamik atuinermut tamanna kinguneqartoq, Air Greenland nittartakkamini allappoq.
Air Greenlandip aqutseriaatsiminnik allannguinerat Tusassimut aamma eqquisoq
Nassiussat piaarnerpaamik apuuffissaannut, aamma suleqatigisaminnut ingerlateqqinneqarnissaannut, apuunneqarnissaannik sulissutiginnittoqartoq, Air Greenlandimi assartuinermut immikkoortortaqarfianit oqaatigineqarpoq.
Tusass suleqataasartut ilagaat, Air Greenlandillu nassiussanik isumaginninniarnerminni atortussaminik nutaamik atulernerata kingorna, Tusassi atuisartunit qaammatini kingullerni saaffigineqartarnerujartorsimavoq. Air Greenlandip sulinerminni atortorissaarutaanit nutaamit paasissutissanik pisariaqartinneqartunik pilersuisoqanngimmat, Tusassip track & trace-a atorlugu nassiussat sumiinnerinik malinnaatitsisinnaasoqannginneranik tamanna annerusumik pissuteqartoq, Tusassimi siulersuisunut ilaasortaq Lars Holm Hansen KNR-imut allappoq.
Aammattaaq kinguaattoornerunerusalernerup allanik peqquteqarnera tikkuuppaa.
- Assartuinermi aaqqissuussineq nutaaq, sila teknikkikkullu unamminiarnartut tamarmik pissutigalugit nalinginnaasumit sivisunerusumik assartuisoqartarneranut pissutaasut pingaarnerit ilagaat.
Nuummi ajornartoorneq: Nassiussat amerligaluttuinnartut
Pingaartumik Tunumi Tasiilamilu assartukkanik qaammatini arlalinni tikittoqarsimannginnera pakatsissutigineqarpoq.
Tusass-ip allakkat poortukkalu 1300-t 1400-llu akornanniittut qaammatini kingullerni marlunni nassiussimagai taanna oqarpoq, nalinginnaasumiilli sivisunerusumik nassiussisoqarniarnera uppernarsarlugu.
-allakkat timmisartukkut Nuummiit Kulusummut Tasiilamullu nassiunneqartut qaammatini kingullerni marlunni kinguaattoorfiungaarsimasut ilumoornerarsinnaavarput. Aammattaaq Icelandairip ukiukkut Islandimiit Kulusummut timmisartuussisarnini matummagu, nassiussat allakkallu Danmarkimeersut Nuuk aqqusaarlugu Tunumut timmisartuunneqartut, Lars Holm Hansen allappoq.
Nuummilu nassiussanik piareersaaneq aqutsinerlu ajornartorsiutaalertarpoq, Air Greenland allappoq.
- Allannguineq ilimagisamit annertuneruvoq, nassiussanillu allakkanillu utaqqineqartunik amerliartuinnartunik ulikkaarallarpoq - pingaartumik Nuummi.
Aammattaaq kinguaattoornerit suleqataannit, ilaatigut Tusassimit assartuisartunillu allanit, pisuussutigineqanngitsut namminnerli aaqqissuussinermut nutaamut nuunnerminnit pissuteqartut, Air Greenlandip erseqqissarpaa – aamma ingerlatseqqinnerup piaarnerpaamik nalinginnaasumik ingerlalernissaa sulissutigineqartoq.
