Nassatat ingerlaannartinneqaqqittalissapput
Air Greenlandimut ilaallutik Nunatta Danmarkillu akornanni angalasut Cimber Sterlingimullu ilaallutik Aalborgimut, Århusimut, Billundimut, Karupimut Rønnemut aamma Sønderborgimut taakkunaniillu bilitseqartut nassataat aqagu sisamanngornermi septembarip aallaqqaataaniit ingerlaannartinneqaqqittalissapput.
Timmisartulli tikinneraniit tullianilu ilaaffissap aallarnissaanut sivikinnerpaamik 45 minutsiussasut, Air Greenlandimit nalunaarutigineqarpoq.
Air Greenlandip Cimber Sterlingillu ukioq manna siusinnerusukkut teknikkikkut ajornartorsiuteqarneq pissutigalugu nassatanik ingerlaannartitsisarneq taamaatippaat. Maannakkullu mittarfinnut taaneqartunut nassatanik ingerlatitseqqinnissamut periusissamik allamik nassaartoqartoq timmisartortitseqatigiiffimmit nalunaarutigineqarpoq.
- Isumaqatigiissulli taamaallaat nassatanut atuuppoq, tassa ilaasunut atuutinngilaq. Tassa bilitsimik aqqutaa tamaat atuuttumik pisisoqarsinnaanngilaq, Air Greenlandilli Cimber Sterlingillu Nunatsinniit Qallunaat Nunaatalu iluani mittarfinnut taakkunaniillu nassatat aqqutaa tamaat ingerlatinneqartarnissaat akueraat, Air Greenland nalunaarpoq.
- Nassatallu aqqutaa tamaat allagartalissammata Kalaallit Nunaanniit illoqarfinnut ukununnga angalasussat: Aalborgimut, Århusimut, Billundimut, Karupimut, Rønnemut aamma Sønderborgimut, nassatanik tunniussinerminni namminneq tamanna oqaatigissavaat. Tamannalu aamma illoqarfinniit taaneqartuniit Kalaallit Nunaannut ingerlasussanut atuuppoq.
Ilaasut Københavnip mittarfianut apuukkunik angalasut aqqusaartagaanni Transfer Centremut saaffiginnissapput, tassani bilitsitik malillugit ornitaq apeqqutaatillugu, tassa Kalaallit Nunaannut imaluunniit Aalborgimut, Århusimut, Billundimut, Karupimut, Rønnemut aamma Sønderborgimut, timmisartumut ikissutissaminnik pissagamik.
Aamma SAS-imut ilaallutik Århusimut Aalborgimullu angalasunut nassatanik aqqutaa tamaat Air Greenlandip ingerlatitsisarnera suli atuuttoq timisartortitseqatigiiffimmit nalunaarutigineqarpoq.
