Qummoroortartut Nassaarfiup eqqaani najugallit tupaqqasut

Qummoroortartut marlunngornerup unnuaani Nuummi Qinngorpumi tillinneqartut affangajaat, tassa 700 kiilut ippassaq unnukkut illoqarfiup ilaani Nuussuarmi quimi nassaarineqarput. Nassaarfiullu eqqannguanni inissiani inillit ilaat tupaqqapput.
Allattoq Bibi Nathansen
decembarip 30-at 2016 15:42

Qummoroortartut 1500 kiilut, 600.000 koruuninillu nalillit, marlunngornerup unnuaani Qinngutsinni tillinneqarput. 

Nuummi illoqarfiup ilaani Nuussuarmi Nuniaffimmi qummoroortartut tillinneqartut affangajaat, tassa 700 kiilut, quimi ippassaq unnukkut nassaarineqarput.

  - Soorunami tupannartorujussuuvoq takullugu qanoq annertutuigisut annissuunneqartut. Quarsaarnarpoq. Qanorluunniit naluara eqqaassanerlugu tupannangaarmat. Qaaraluallarpata nalunngilarput blokki uuma iluani susoqassava, nassaarfiup eqqannguani ineqartoq, Arnajaraq Jeremiassen KNR-imut oqarpoq.

Taanna unnukkut pujortariartilluni politiit qatserisartullu ippassaq unnukkut ulapputtut takusamavai.

<!--

AAMMA ATUARUK Qummoroortartunik tillittutut pasisat tigusaasut

-->

- Annilaarnartupilussuuvoq. Toqqissisimajunnaaraluarpunga takullugit qanoq annertutigisorsuit. Toqqissisimananngitsorujussuuvoq manna eqqissisimasuugami nipaattuullunilu, annilaarnartorujussuuvoq taamaattumik takulluni. Allaat ajortillunga, misigisimaleraluarpunga eqqissiveerullunga; susoqartoruna? Arnajaraq Jeremiassen oqarpoq. 

Taanna nassaarfiup eqqaani najugaqartuni kisiartaalluni tupaqqasuunngilaq. 

- Ersinarpoq nalullugu taama qanitsigisumik taamaaliortoqarsimasoq. Annilaanganarluni, Bebiane Abrahamsen inissiani aamma najugalik oqarpoq.

Najukkami eqqanngua nassaarfiummat Bebiane Abrahamsen tupinnanngitsumik tupaallappoq.

- Tupappunga taama qanitsigimmat. Uagullu nalullugu taama qanitsigisumi taama pisoqarsimammat, Bebiane Abrahamsen oqarpoq.
<!--

AAMMA ATUARUK Qummoroortartut 700 kiilut Nuussuarmi quimi nassaarineqarput

-->