Naser Khader naalakkersuisunik pilersitsinissaminut piareersalerpoq

Naak Folketingimut qinersinissaq suli nalunaarutigineqanngikkaluartoq Ny Alliancep siulittaasuata Naser Khaderip naalakkersuisunik pilersitsisinnaanissaq piareersalereerpaa. Tassami suleqatissarsiulereerpoq. Naser Khader siusinnerusukkut Folketingimut ilaasortanik nunatsinneersunik suleqateqartareersoq Radioaviisimut ima oqarpoq:
aggustip 22-at 2007 17:09

- Atlantikup Avannaani Suleqatigiit siusinnerusukkut suleqatigisareerpakka. Tassami folketingip nunanut allanut ataatsimiititaliaani Lars-Emil Johansenimut sinniisutut inissisimanikuugama. Tassa oqarsinnaavugut nunanut allanut tunngatillugu suleqatigiissimalluta. Aamma CIA-p tigusanik timmisartuussisarnera pillugu suleqatigiilluarnikuuvugut.

Tassami Atlantikup Avannaani Suleqatigiit suleqatiginikuuakka tassa taamani Enhedslisten, Socialdemokratit, SF-it uangalu timmisartuussisarnerit pillugit nunanut allanut ministerimut apeqquteqaateqarnitta kinguneranik folketingimi oqallittoqarmat. Tassa oqartoqarsinnaavoq arlalitsigut ataatsimoorussatsinnik soqutigisaqartugut Naser Khader oqarpoq.

Khader aperineqarami Atlantikup Avannaani Suleqatigiinnut suleqatigiinnissamik kajumissaarinersoq, oqarpoq Atlantikup Avannaani Suleqatigiit kajumissaarusullugit danskit partiilersuullutik saamerlernut talerperlernullu avissimanerannik atorunnaarsitsiniaqataaqqullugit.

- Isumaqarpunga talerperliuniat imaluunniit saamerliuniat kisermaassillutik naalakkersuinermik oqartussaasarnerat peqqinnanngitsuusoq. Inuinnaat oqartussaaqataanerata aqqani partiit amerlanerusut oqaasissaqaqataasariaqarput, Naser Khader oqarpoq.