Naser Khader-ip Esperseni illersorpaa
Tamatumani Bruxellesimi EU-p ataasinngormat ataatsimiinnissaani nunanut allanut ministerip feeriarnini pissutigalugu peqataasinnaanani nalunaruteqarnera pineqarpoq. Lene Espersen pisoq pillugu oqaaseqarumanngilaq, Konservativilli nunanut allanut oqaaseqartartuat Naser Khader oqarpoq:
- Nunanut allanut ministereqarfiup ilaliineratigut Bruxellesimi ataasinngormat ataatsimiinnermut peqataasinnaanani nalunaarsimavoq, pissutigalugu pisut uteqqinneqassanngitsut naliliisoqarmat, imatullu paasineqassanngilaq ataatsimiinnernut peqataasassanngitsoq, tassami ataatsimiittoqartuaannarpoq aammalu ataatsimiinnerni sapinngisamik amerlasuuni peqataasarpoq. Isumaqalerpunga isornartorsiuineq ingasappallaalersoq, Naser Khader oqarpoq.
Partiip naalakkersuisunik tapersersuisup Dansk Folkepartip aammattaaq Lene Espersenip nunanut allanut ministeritut piginnaassuseqarnera maanna qularutigilerpaa, Dansk Folkepartiilli nammineq isummani nipangiusimasariaqaraluarai Naser Khader isumaqarpoq.
- Isumaqarpunga Dansk Folkeparti imminut isumagisariaqartoq namminnerlu politikkertik aallullugu partiit allat iluminni suliassaannut akulerunnani. Isumaqarpunga partiinut allanut tunngatillugu imminut pisussaatilluni naliliisartutut annerusunngortinneq ileqqorissaarnerunngitsoq, Naser Khader naggasiivoq.
