Narup: Paasissutissat tamarmik tunniunneqareerput
Kommuneqarfik Sermersuup kommunalbestyrelsiata, aningaasaqarnermut ataatsimiititaliata aamma missingersuusiornissaq pillugu isumasioqatigiissitsisimanerata pappialartai Radioaviisimit tiguavut, taakkunani atuarneqarsinnaavoq Aningaasaqarnermut Ataatsimiititaliap oktobarip 17-iani ataatsimiinnermini atuarfeqarnermut tunngatillugu 10 millionit koruunit inulaarlugit sipaaruteqarnissaq oqaluuserisimagai.
Kommunalbestyrelsep oktobarip 28-ani immikkut sammisaqarnermini sipaarfiusinnaasut itisilerlugit aamma oqaluuserisimavai, taamatuttaaq sipaarutissat kingunerisinnaasaannik misissuisitsisimanerup inerneri aamma saqqummiunneqarsimapput. Paasissutissat pineqartut kommunalbestyrelsemi ilaasortanut tamanut ulloq sioqqullugu e-mailikkut aamma nassiunneqarsimapput.
Taamaattumik illuatungiliuttut erseqqissumik paasissutissinneqarsimanngitsutut oqaaseqarnerat borgmesterip Asii Chemnitz Narupip Inuit Ataqatigiinneersup paasiuminaatsippaa, illuatungilliuttut akornanni susoqarsimasinnaanera apeqqutigaarput, imalu akivoq:
- Naluara, eqqoriarpiarsinnaanngilara. Kisianni asuliinnaanngitsorujussuarmik uparuarneqarpunga naammanngitsunik tunngavissiilluta aalajangertitsiniaasimasutut, taannali uanga pissuserinngilara.
Asii Chemnitz Narup aamma oqarpoq illuatungiliuttut paasissutissat pisatik suli naammaginngikkunikkit saaffiginnissinnaasut, uanili missingersuutit pineqartut naammassineqareermata ataatsimoorlunilu taasisoqareermat allanngortinneqarsinnaanngitsut.
Kommunalbestyrelse oktobarip 29-ani ataatsimiinnermini ukioq mannamut missingersuutissatut siunnersuut siullermeerlugu oqaluuseraat, tassanilu erseqqissaatigineqarsimavoq novemberip sisamaa nallertinnagu allannguutissatut siunnersuutissaqartoqarpat nassiussisoqarsinnaasoq, ullorli taanna nallermat atuarfeqarnerup tungaatigut sipaarutissatut siunnersuutinut allannguutissatut siunnersuutinik takkuttoqarsimanngilaq.
Kommuneqarfik Sermersuumi borgmesterip sinniisussaata aappaa kiisalu kommunalbestyrelsemi Siumup gruppeani siulittaasoq Martha Abelsen borgmesterip akissutai pillugit oqaaseqarumanngikkallarpoq, suliaq suli ingerlasutut isigigamikku apeqqutillu nutaat borgmesterimut nassiussimasatik suli akineqarsimanngimmata.
