Narsarsuup matuneqarnissaa ernumagaat

- Narsarsuup matuneqarnissaanut Nunarput akissaqanngitinngilaq, taama naliliipput Narsarsuarmi Nunaqarfimmi Aqutsisut kissaatigaallu Naalakkersuisumit orninneqarlutik matusinissaq pillugu nassuiaanneqarnissartik.

Siorna tikillugu Narsarsuaq 20 mio koruunit tikillugit iluarsaanneqarpoq aamma ilaqutariit illuliorumasut akuerineqartarput maannamullu illut arfinillit sanaartorneqareersimalerput. Nuqarfimmi Aqutsisuni siulittaasoq Louis Grønvold ilaasortallu Kristine Lund aamma Telef Enoksen toqqissisimanginnerarput.

-Isumaqarluinnarpunga Kalaallit Nunaat massakkuugallartoq akissaqanngitsoq mittarfik Narsarsuartut ittoq matussallugu, taama oqarpoq Louis Grønvold.

Narsarsuup ingerlanneqarneranut ukiumut 12 mio koruunit kaaviiaartinneqartarput.

-Taakkua tassa annaaneqartariaqalissapput. Suminngaanniit qanorlu ilillugit aaneqassanersut nalunartorujussuuvoq, taama oqarpoq Kristine Lund. Telef Enoksen aamma oqarpoq, Narsarsuarmi pioreersut hangarit assigisaallu mittarfimmi pigineqartartut pigereeritsik, tamakkualu Qaqortumi sanaartorneqassappata akisoorujussuussasut nutaatut sanartornissaat.

- Narsarsuaq matussappat Naalakkersuisut kommunilluunniit isumagisariaqarpaat sumut nuunnissarput inissaqartinneqarnissarpullu, taama aamma oqarpoq Telef Enoksen.

Sulisut Narsarsuarmut ukioq naallugu sulissagaangamik illoqarfimmi inigisartik qimattariaqartarpaat.

-Inissarsioqqittussatut nalunaartariaqartarput utaqqisutullu kingullerpaanngortinneqartarlutik. Illoqarfimmut allamut nuutsinneqassagunik sumi sulilissappat? Sumi ineqassappat?, taama aperaaq Kristine Lund, Narsarsuarmi Nunaqarfimmi Aaqutsisuni ilaasortaq.

Nutaamik Qaqortumi mittarfiliorneq katillugit 1,2 milliardit koruunit missaannik inuiaqatigiinnut akeqassasoq, Storch Lund, Narsarsuarmi Mittarfimmi pisortaq oqarpoq.

Mittarfeqarneq pillugu Naalakkersuisoq Kim Kielsen pissarsiarinnginnatsigu oqaaseqartinngilarput.