Narsarsuup Kangerlussuullu siunissaat ilusilersuleraat
Suleqatigiissitat marluusut aappaa Kangerlussuup siunissaanik suliaqassaaq, Namminersorlutik Oqartussani aamma Qeqqata Kommuniani atorfilinnik inuttaqassalluni.
Suleqatigiissitat aappaat Narsarsuup siunissaa pillugu suliaqassaaq, taannalu politikkikkut aqutsisoqatigiinnut Allaffissornikkullu suleqatigiissitanut avitaavoq, Kommuni Kujallermit Namminersorlutillu Oqartussanit tamarmik inuttaqartussat.
- Suliassaalersussat kingunerisaannik pisariaqartitanik aalajangersimasorujussuarnik misissuissaagut, taamaalilluta nunaqarfiit marluusut siunissaat ataatsimoorluta paasinarsitissinnaalissagatsigu, Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq.
Narsarsuarmi Mittarfeqarfiit nalilersuiffigineqassaaq
Narsarsuarmi mittarfiup qulimiguulinnut mittarfinngornissaa, Narsarsuarmut qanoq kinguneqassanersoq nalilersorneqassaaq, taamatullu Mittarfeqarfiit sullissiviini qanoq iliortoqarsinnaaneranik nalunaarusiortoqassalluni. Suliffeqarfiup qanoq ililluni naapertuussarneqarsinnaanera kikkullu akisussaaffigilerumaarneraat nalunaarusiarineqassalluni.
Peqatigiiffiup "Narsuarsuaq piujuarli"-p inatsisitigut pituttorsimasumik isumaqatigiissusiortoqarnissaa kissaatigaa, suleqatigiissitallu suna kissaatigineqarnersoq paasiniassallugu suliassaasa aamma ilagaat.
Kangerlussuaq kommunip akisussaaffigilersinnaagaa
Nuummi Ilulissanilu mittarfissuaqalerpat Kangerlussuarmi mittarfiup qanoq atorneqarsinnaanera misissorneqassaaq. Tassani Kangerlussuullu mittarfia Qeqqata Kommunianit tamakkiisumik ilaannakoortumilluunniit akisussaaffigineqalissanersoq suleqatigiissitap aamma misissussallugu.
Suleqatigiissitaq aamma Sisimiut Kangerlussuullu akornanni aqqusinniornissaq pillugu suliami aamma peqataassasoq allassimavortaaq.
Suliat Naalakkersuisunut kommunalbestyrelsinullu nalunaarusiornermik inerneqassapput, taakkualu Kangerlussuarmi Narsarsuarmilu innuttaasunit kingorna oqallisigineqassallutik.
