Narsarsuarmiunut qularnaveeqqusiinngilaq: Naalakkersuisut aalajangiissapput
Narsarsuarmi mittarfissuaq heliportinngussappat sulisunut kinguneqarnerlussinnaavoq, ilaasa suliffitsik najugaqarfitsillu annaasinnaagamikkit.
Taamaattumik kommunep Namminersorlutillu Oqartussat Narsarsuarmi innuttaasunut eqqugaasussanut nutaamik inissaqartitsinissaannik suliffissaqartitsinissaannillu neriorsorsinnaanerlugit isummerfigisussaavaat.
Suleqatigiissitat, nunaqarfiup siunissaanik ukiup affaa kingulleq suliaqarsimasut, taama siunnersuuteqarput.
AAMMA ATUARUK Narsarsuup Kangerlussuullu siunissaat ilusilersuleraat
Peqatigiiffiup "Narsuarsuaq piujuarli"-p toqqissisimanissamut isumaqatigiissut inatsisitigut pituttuisoq innuttaasunut eqqugaasussanut nutaamik inissaqartitsinissamik suliffissaqartitsinissamillu qulakkeerisussaq 2018-imi novembarimi siunnersuutigaa.
Qularnaveeqquteqanngilaq
Narsarsuulli mittarfia matuneqassagaluarpat sulisut suliffissaqassanerannut qularnaveeqquteqanngitsoq, nalunaarusiami saqqummersinneqaqqammersumi erseqqissaatigineqarpoq.
Nunatta sinnerani innuttaasunut inatsisit atuuttut, soorlu suliffeerunnermi sulinermullu atatillugu najugarisap annaanerani, Narsarsuarmi aamma malinneqassasut, nalunaarusiami allassimavoq.
Qularnaveeqqusiinissaq Kommune Kujallermi borgmesterip neriorsuutigisinnaanngilaa, tassami kommunalbestyrelsi Kommune Kujalleq tamaat isigalugu sulisussaasoq, borgmesterip erseqqissaatigaa:
- Innuttaasut sumiluunniit ikkaluarpata naligiimmik sullinneqarnissaat pineqarnissaallu tunngavigalugu Narsarsuarmi innuttaasut aalajangiiviniarneqarput, Kommune Kujallermi borgmesteri Kiista P. Isaksen oqarpoq.
AAMMA ATUARUK Mittarfiit pillugit ingerlaaqatigiinnermik takutitsisorpassuusut
Piginneqatigiifik inuussutissarsiutinik ineriartortitsinermik suliqaartoq Innovation South Greenland Kommune Kujalleq tamaat isigalugu pilersaaruteqartoq, borgmesterip oqaatigaa.
- Naatsorsuutigivarput nunaqarfimmi aqutsisut, attuumassuteqartut, rapporti suliarineqarsimasoq aammalu politikkikkut aqutsisoqatigiit isummersorfigisimasaat taakku aallaavigalugit inerisaanissaq ingerlattussaassallugu, Kiista P. Isaksen oqarpoq.
Nunaqarfik matuneqassanngilaq
Suleqatigiissitap siunnersuusiai kommunalbestyrelsimit oqallisigineqassapput, tassanilu innuttaasut peqataatinneqarnissaat pingaaruteqartoq, Kiista P. Isaksen oqarpoq. Kommunalbestyrelsimi ilaasoortat septemberimi ataatsimeeqqissapput, tassanilu inaarutaasumik siunnersuutit saqqummiunneqarumaartut, taassuma nalunaarutigaa.
- Nalunaarusiaq aallaavigalugu nunaqarfimmi aqutsisut attuumassuteqartullu allat suleqatigalugit aaqqiissutissanik nassaarumaarluta naatsorsuutigaara. Taamaalilluta Narsarsuaq ineriartortissinnaassavarput. Erseqqissaassutigeqqissavaralu Narsarsuaq nunaqarfittut matuneqarnavianngimmat, borgmesteri oqarpoq.
Narsarsuarmi mittarfik heliportinngortinneqassappat Mittarfeqarfimmi sulisut 50-it allamik suliffissarsiortariaqassasut, nalunaarummi atuarneqarsinnaavoq.