Kunuk Grønvoldip akissutissarsinissani utaqqigaa: Narsarsuarmi pilersaarutit unitsikkallarneqartut

USA-mut tunngatillugu pissutsit ilungersunartut Narsarsuup qanoq ikkumaarneranik nalornisitsipput. 

Nunaqarfimmi nunatta, Danmarkip USA-llu akornanni isumaqatiginninniarnerinut ilaavoq, tassa pissaanilissuup Narsarsuarmi sakkutooqarfeqalernissaanik kissaateqarnera paasineqarmat.  

Kunuk Grønvoldip siunissap qanoq ikkumaarneranik eqqarsaateqartut ilagaat. Narsarsuup siunissaanik nalornissuteqarneq pilersaarutaanik unitsitsigallarpoq. 

Nunaqarfimmut asannilertoq 

Kunuk Grønvold Qasigiannguaninngaanneerpoq. Siullermik Narsarsuarmeeqqaarpoq 2017-imi ukiukkut, Hotel Narsarsuarmi igaffimmi taamani aqutsisunngorami. 

- Tassanngaanniit nunaqarfimmut asannilerpunga. Aasaanerani ulapaarfik qaangiukkaangat nipaannera assersuutigalugu illoqarfinnit allanit sanilliullugu eqqissisimanarnerusutut misinnartarpoq

Narsami ullumikkut najugaqarpoq. KNR-illi sulinngiffeqarluni Narsarsuarmukarsimasoq naapippaa. 

- Allamukarusunngilagut.

Aappanilu Narsarsuarmi illuaraqarput, 2024-p tungaanut najugaqarfigisimasani. Nunaqarfimmulli asanninneq aamma pilersaaruteqalersitsipput.

- Assersuutigalugu igaffeeqqamik aallartitsinissara eqqarsaatigaara. Nuannerunaqaaq. Taamaalillunga annerusumik minnerusumilluunniit imminut pilersorsinnaalissaanga. 

Ataaserli aporfiuvoq: Narsarsuup siunissaanik nalornissuteqarneq

Nunat akornanni politikki pilersaarutinik unitsitsigallartoq

Generalip ukiup aallartilaarnerani tusarniaanermi Narsarsuaq nunatta, Danmarkip USA-llu akornanni suleqatigiissitamit eqqartorneqartut ilagigaat oqaatigaa.

Naalakkersuisut isumaqatiginninniarnerit pillugit oqaaseqarpianngillat, nunattali, Danmarkip USA-llu akornanni suleqatigiissitaq inerniliinngippat kujataani kommuni inerniliisinnaanngitsoq Kommune Kujallermilu borgmesteri Malene Vahl (D) oqarpoq. 

Kunuk Grønvoldilu taamaattoqarnerani nalornivoq. 

- Pilersaarutit maaniissinnaanngikkutta ajoraluartumik piviusunngorsinnaanngillat. 

Qassiarsummi, Igalikumi Narsarsuarmilu nunaqarfiit siulersuisuini siulittaasup Mouritz Karlsenip (IA) Narsarsuaq Amerikamiut sakkutooqarfigileqqissappassuk Narsarsuarmi innuttaasut nunaqarfimmiiginnarsinnaannginnertik ernumassutigigaat siornatigut oqaatigaa. 

Isumaqatiginninniarnerilli qanoq inerneqassanersut suli ilisimaneqanngilaq.

- Kommunimut tamanna pillugu aamma attaveqarniartaraluarpunga, aalajangersimasumik qanoq iliuuseqarniarnersut, pilersaaruteqarnersut siunnersuuteqarnersulluunniit siunissami qanoq iliornissatsinnik ikiuutaasinnaasunik paasiniaallunga. 

Nunanut allanut ministerip Lars Løkke Rasmussenip nunatta, Danmarkip USA-llu akornanni suleqatigiissitap ukiup naannginnerani inerniliussaqarnissaat naatsorsuutigaa. 

Kunuk Grønvoldili oqartussat oqaloqatigiinnerit qanoq inerneqarumaarneri pillugit saqqummiussinissaannut utaqqisinnaanngilaq. 

– Tuavi, iliuuseqaritsi oqalugitsi. Maani tusagaqarnissamik susoqarnissaanik paasisaqarusuttunik suli inoqarpoq, taanna oqarpoq.