Narsarsuaq Narsap Kommuneata ataannaqquaat
-Uagut qullersatsinnut paasiniaagaluraangatta aamma taakku uagutsinnut akisarput, naluaat qanoq ingerlariaqqittoqassanersoq.
Taama oqarpoq Narsarsuarmi ukiut 28-ssaat oldfrue-usoq Helene Grønvold, nangipporlu:
-Uaguulluni toqqissisimananngilaq, Narsarsuarooq matussaaq, Narsarsuarooq ammaannarniarpoq, ulluinnarsiutaasutut misigisimanarnalerpoq, ukiumiit ukiumut oqartarnerit uku, Narsarsuup siunissaa qanoq innersoq. Oqarunik Narsarsuaq atuutiinnassaaq, ukioq qanoq ilinngitsoq oqalulissapput Narsarsuarooq matussaaq. Soorunami ilaannikkut tusaalluguluunniit tusaanaguluunniit assigiiginnalernikuuvoq. Assorsuaq pilersaarusioruminaappoq, aammalu suliffeqarfik siunissami qanoq-una ingerlaniartoq, sulistsisuulluni aamma nalunarsisarami. Soorunami sulisut aamma apersortuarput qanoq pineqarniarnersugut, ukiunngooq tulliani sussaagut, suliunnaassanerpugut? Sulitsisuulluni akiuminaatsorujussuusarput apeqqutit tamakku. Qullersatsinnut paasiniaagutta aamma taakku naluaat qanoq pisoqassanersoq.
Narsarsuarmi Oldfrue Helene Grønvold taama oqarpoq. Silami sulisartut, biilileriffimmiut, sanasut, umiarsualivimmi usingiaasartut, ruujorilerisut, eqqiaasut, igaffimmi cafeteriamilu sulisut, meeqqerisut atuarfimmilu sulisut 27-t SIP-mi Narsarsuarmi ilaasortaapput, siulittaasoq Ingeborg Hansen oqarpoq toqqissisimanatik.
-Mittarfik pioreersoq, aningaasarpassuit atorlugit iluarsaateqqammisoq, atortut, illuutit, sulisut, tassaqaluunniit tamakkua takorloorneqarnikuuppat.
Siunissaq qanoq isikkoqariataassanersoq SIP ilisimatinneqarsimanersoq Narsarsuarmi SIP-mi siulittaasoq, Ingeborg Hansen, aperineqarami oqarpoq taamaattoqanngitsoq. Pissutsit tujorminarnerarpai erloqinarnerarlugillu, pingaartumik sivisuumik Narsarsuarmeereersimagaanni. Mittarfik taama sivisutigisumik pioreersoq, mittarfittaarniaannarluni matuniarneqassappat pissusissamisuunngilaq, Ingeborg Hansen, oqarpoq.
Narsap borgmesteria Kiista P. Isaksen oqarpoq, massakkorpiaq Narsarsuarmiit misissorneqartoq, Narsarsuarmi innuttaasunik qaqugu ataatsimiisitsisoqassanersoq.