Narsarsuaq innersuussutigaat
IA-p inatsisartuni ilaasortaatitaasa Issittumi sakkutooqarfiup Narsarsuarmi inissinneqarnissaa innersuussutigaat. Sipaaruteqartoqarnissaa kisiat pinnagu aamma kujataani aningaasarsiornikkut ineriartornermut pingaaruteqarluinnarmat, Inuit Ataqatigiit politikkikkut oqaaseqartartuat Aqqaluaq B. Egede taama allappoq.
Illersornissamut ministeeriaqarfiup nalunaarusiaani qanittukkut saqqummiunneqartumi, Kangilinnguani sakkutooqarfimmi suliat Nuummut Narsarsuarmulluunniit nuunneqarneratigut aningaasartuutinik ileqqaartoqarsinnaanera tikkuarneqarpoq.
Issittumi sakkutooqarfissap Nuummiinnissaanik Kuupik Kleist siornatigut oqarsimagaluartoq, partiimi tunuliaqutaasa, sakkutooqarfissap kujaataaniinnissaa illersorpaat.
- Kommunini inuussuutissarsiutit ineriartortinneqarnerat innuttaasut pisinnaanngoriartornerannik malitseqassaaq, nunap immikkoortuini atugarissaarneq aningaasarsiornerlu ataqatigiissumik ineriartortinneqartariaqarput, Aqqaluaq B. Egede oqarpoq.
Taassuma Kommune Kujalliup borgmesteria Simon Simonsen taperserpaa, ippassaq radioaviisimi oqarmat, illoqarfiit allat aningaasarsiornikkut ineriartortinneqartariaqartut, Nuuk kisiat pinnagu.
IA-p inatsisartuni ilaasortaatitai, partiimi siulittaasumik, naalakkersuisut siulittaasuata Kuupik Kleistip siornatigut oqaatigisimasaannut isumaqataannginnersut, Aqqaluaq B. Egede aperineqarami taanna oqarpoq, Issittumi Sakkutooqarfissap sumiinissaa Naalakkersuisut aalajangigassarigaat. Taamaattorli IA-p Inatsisartuni ilaasortaatitaanit Issittumi Sakkutooqarfissap Narsarsuarmiinnissaa innersuussutigineqartoq.
