Kujataani Nanortallip pigisaani Narsarmiuni aalisartut piniartullu aalisagarpassuaqarneraagaluartut tunitsivissaqanngillat.
Narsarmiunilu tunisassiorfik ammaqqinniarlugu nunaqarfimmiut Arctic Green Food-imut saaffiginnissimapput. Tunisassiorniarsimagaluarnerli imminut akilersinnaasimanngitsoq, Tønnes Berthelsen ullaaq iterluarnaamut oqarpoq:
- Narsarmiut Arctic Green Food-ip akisussaaffiginngilaa. Misiliutitulli 2005-imi Narsarmiuni aalisakkerivik ammarparput, tunisassiorneq toqqammavissaqarnersoq paasiniarlugu, paasinarsivorli Narsarmiuni aalisakkeriveqarneq toqqammavissaqanngitsoq, Tønnes Berthelsen taama oqarpoq.
Nanortalimmi aalisakkerivimmi suliassaqarpallaarneq pissutaalluni maannakkorpiaq matoqqatitsisoqaraluartoq Nanortalimmut tuniniaajartortarnissaq Tønnes Berthelsen-ip kajumissaarutigaa. Erseqqissaatigaali Nanortalimmi aalisakkerivimmik matoqqatitsineq aaqqiivigineqangajalersoq.