Narsaq Mittarfeqarfinnut millioninik akiitsoqarpoq
Narsap kommuneata Mittarfeqarfiit ukiut aappassaanni 1 million kruunit sinnerlugit akiitsoqarfigaat. Mittarfeqarfiit immikkoortortaqarfimmi pisortaq Poul Werner Jensen oqarpoq, Narsap Kommuniata Narsarsuarmi kiffartuussineq eqqarsaatigalugu Mittarfeqarfinnut akiligassai 2,4 mio kruunit missaanniilersimasut. Akiligassatut taakkartorneqartut 2004-imiilli kommunip mittarfeqarfiullu akornanni oqaloqatigiissutaalersimapput, ullorli manna tikillugu suli aaqqiissutissamik nassaartoqarsimanngilaq.
Maanna KANUKOKA isumaqatiginniarnermut akuliussimavoq, Poul Werner Jensenillu oqarnera naapertorlugu isumaqatiginninniarneq pitsaasumik ingerlavoq, sulili isumaqatigiissuteqartoqarsimanani.
Narsap borgmesteriata Kiista P. Isaksenip ilumoornerarpaa isumaqatiginninniarnerit maanna KANUKOKA ikiortigalugu ingerlammata, taamaattumillu erseqqinnerusumik tamanna pillugu oqaaseqarsinnaannginnerarluni:
- Qanoq annertutigisunik akiligassaqarnersugut oqaatigineqarsinnaavissorinngilara, suliassaq kommuneingeniørit kommuneqarfiillu kattuffiata KANUKOKA-p ingerlappaat. Kisianni isumaqatiginniniarnerit ingerlapput. Kiista P. Isaksen oqarpoq.
Aamma oqarpoq, akit qaffasippallaartut tamannalu Mittarfeqarfinnut anngunneqarsimasoq, saaffiginnissutilli akineqarsimanngitsut.
- Assersuutigalugu qatserisartunut akiliutigisartakkat 900.000 koruunit aamma isumaqarpunga qaffasippallaarujussuartut. Tamakkuupput qaffasippallaarujussuartutut nalilerlugit saaffiginnissutigisavut. Kiista P. Isaksen oqarpoq.
Siunissami aaqqiissutissaq akikinnerpaaq anguniarlugu Narsap Komuunniata Narsarsuarmi suliassanut suliarinnittussarsiuussisalernissani naatsorsuutigaa, Mittarfeqarfinniit akikinnerusumik nassaarniarluni. Mittarfeqarfiit suliassap isumaginissaa ilimaginngilaa, namminersortunut unammillerusunnginnamik.
