Narsaq misissuiffigineqaleerpoq

Narsap Kommuniani immikkoortut tamarmik kukkunersuisunit, Kommunaldirektørimit kommunillu Aningaasaqarnermut pisortaanit misissuiffigineqalerput.

Kommunit Nakkutilliisuisa qanittukkut Narsamiikkamik tikkuagaasa ilagaat, Namminersornerullutik Oqartussaniit kommunip nammineq aningasat pisassani aammalu ukiup tulliani erloqinartorsiorluni sipaarujussuassanngikkuni sipaarniutissani eqqumaffigisariaqarai.

Tassani pineqarput qaammatip aallartinnerani kommunip akilerallartagai Namminersornerullutik Oqartussat taarserlugit akiligassaat. Assersuutigalugit utoqqalinersianut aningaasartuutit 90 % -ii utertinneqartussapput. Siusinaarlutik pensionisialinnut aningaasartuutit 90 imaluunniit 50 procentiisa utertinissaat, takkunani apeqqutaammat ukioq suna pensionisiaqalersimaneq.Aammalu taamatorluinnaq peqqussuteqarput innarluutilinnut aningaasartuutit.

Narsap Kommunia januaarip aallaqqaataani siusinaarlutik pensionisisartussanut 39 –nut aningaasartuuteqassalluni missingersuusiorsimavoq, kisiannili ullumikkut 50 –nik amerlassuseqalersimapput ammalu meeqqat inuusuttuaqqallu naatsorsuutigisamik amerlanerit ulloq unnuarlu paaqqinittarfinnut angajoqqaarsianullu inissinneqarsimapput.

-Ukiup naanissaata tungaanut ullumikkornit sipaarnerusariaqartugut isumaqanngilanga. Sipaarniarnissaq politikkikkut ulloq manna tikillugu isummerfigineqanngilaq. Kisianni kukkunersiuisut, Aningaasaqarnermut pisortarput uangalu, kommunip immikkoortui ataasiakkaarlugit oqaloqatigalugit aallartippavut. Paasiniarniarparput immikkut tapissutinik pisariaqartitsisoqarnersoq aammalu immikkoortuni sipaarniartoqarnissaa pisariaqarnersoq. Tamakku tamarmik kommunalbeastyrelsimi kingusinnerusukkut isummersorfigineqarumaarput, taama oqarpoq, Narsap Kommuniani kommunaldirektøri Niels Højrup.