Narsaq japanimiumik tikeraarteqarpoq

Japanimiu arnaq Masako Suzuki, Narsap Kommunianit tikeraarsarneqarluni maanna tikeraarpoq. Masako Suzuki qallunaatuunngortitsilluni nutserisuuvoq. Narsamiit angalaqatigiit Japanimeeqqammerput, japanimiut naatitseriaasiat, nunanut issittunut, soorlu Kalaallit Nunaannut, naleqquttoq, alapernaakkiartorlugu. Masako Suzukip tikeraarnerani pingaarnerutineqarpoq naatitanik Narsami naatitsivik, aammali suleqatigiissutaasinnaasunik isumassarsioqatigiiffiusinnaasut nammineq isiminik takuniarpai.

Narsami politikerit atorfilittallu Japanimi attaveqaataannut Masako akunnermiliuttutut atorneqassaaq.

Tikeraap Narsami suliffeqarfiit takuniarnerisa saniatigut, Narsap iluani savaateqarfik takusarsimavaa, aamma kaffisoriartoqataasimavoq, inuit aqqusinermi naapiortorsimavai, pingaarnertulli naatitanik naatitsivik takuniarsimallugu.

-Narsarmiut Japanimi naatitanik naatitsivik takuniarmassuk tassani attaveqaataasut illuatungaatigullu Narsami Bent Olesen apeqqutissaqarpata, imaluunniit ilisimateqatigiissutissaannik apuussisartussaavunga, Masako Suzuki oqarpoq.

-Japanimi pissarsiarisavut aammalu Japanimi pissarsiarisatik misileralerpata qularnanngitsumik apeqqutit assigiinngitsut takkuttassapput, pingaartissimavarput inummik aalajangersimasumik attaveqarfeqarnissarput, taama nassuiaavoq Kiista P. Isaksen.

Kiista P. Isaksen nangilluni oqarpq, inuutissarsiutinik suliffeqarfiit allat takusariaqarmagit taamaammat aamma Masako tikeraartinneqartoq, taavalu suleqataaffiusinnaasut nassaarineqarpata Japanimi attaveqaataasinnaasut namminneq ilisimanngisatik Masako-p ilisimammagit akunnermiliuttutut taanna inissisimasussanngortoq, Kista P. Isaksen, Narsami borgmesteri, oqarpoq

Masako-p Danmarkimut angalanini nammineq akilersimavaa sulinngiffeqarluni angalagami, Danmarkimiilli Narsamukarnera uterlugulu Narsap Kommuniata akilerlugu.