Narsap katersugaasiviata Tasiilaq sammivaa
Assit kusanaqisut arlallit hollandimiumit inuit pissusaannik ilisimatusartumit, Jakob van Zeulenimit, Tasiilami assilineqarsimapput.
Assit tamarmik sukumiisumik paasissutissiipput.
Tunumi atortut pigisallu kusanarsaakkat saqqummersinneqartut kusanaqisut Elisa Kaliamit, maanna Narsami najugaqartumit, pigineqarput.
Taakku soorlu makkuullutik: sakkut, illumi igaffimmilu atortut kusanarsaakkat, taakkulu Elisa Kaliap aanaakkuminit kingornussarai. Tamakku tamarmik peqqissaaruteqqissaarlugit sananeqarsimaneri takuneqarsinnaapput.
Elisa Kalia-p uia, Poul Qeqe, pigisat, piffissaq ilaqutariillu pillugit saqqummersitsinermi oqaluttuassaaq, saqqummersitat qanoq atorneqartarsimanersut, aamma van Zeulenip assilisaani ilaqutariit takuneqarsinnaasut 1930-kkunni qanoq inuusimanersut oqaluttuaralugu.
Saqqummersitsineq ippassaq aallartippoq, saqqummersitallu maajip 29-ata tungaanut takuneqarsinnaassapput. Amsterdamimi katersugaasiviup, Rijksmuseum voor Volkenkunde-p, suleqatigineratigut Narsami saqqummersitsineq piviusunngorsinnaanngorsimavoq.
