Narsap immiaaraa mamarineqarpallaanngitsoq
Danmarkimi atuagassiaq Søndagsavisen juullip immiaaraannik assigiinngitsunik misileraasimavoq. Tassani Juullip immiaaraa Narsameersoq Greenland Brewhouse Christmas pitsaavallaanngitsumik nalilerneqarpoq. Webavisen taama allaaserisaqarpoq.
Aviisip misileraanermini ilaatigut naliliisorai danskit immiaaqqat pillugit allaaserinnittartut peqatigiiffianni Danske Ølskribenters Laug-imi siulittaasoq Allan Mylius Thomsen, Nørrebro Bryghus-imi immiortuuneq Anders Kissmeyer aamma Københavnimi kulturimut borgmesteri Martin Geertsen.
Juullip immiaaraa Narsameersoq pillugu immiaaqqanik soqutigisallit isumaqarput puiaasaq kusanarluinnartuusoq, taamaattorli imaa immiaaqqatut qaamasutut piukkunnarnerusoq, juullillu immiaaraatut piukkunnannginnerulluni.
Immiaaraq taartuugaluarpoq kusanarlunilu, taamaattorli qapua sukkavallaamik kittarluni akuutissanillu akuugaagaluarluni qapussunnippallaarluni.
- Oqimaaqatigiinngilaq lakridsisunnillunilu. Aamma susunninnera sivikippallaarpoq, naliliisut isumaqarput.
2006-imi juullip immiaaraa pitsaanerpaaq Raasted Bryghus-imeersuuvoq.
