Narsap eqqaani nannut marluk pisarineqarput
Nannut marluk Narsap eqqaani ulluni kingullerni marlunni pisarineqarput.
Nannup aappaa Narsarsuup eqqaani savaatillit illuata isaariaanut ippassaq iseriartortoq aallaallugu pisarineqarpoq.
Allattoq Jaaku Lyberth
Savaatillit pineqartut nanoq ippassaanikkunnili eqqaminni qanillattortoq maluginiarsimavaat, tamatumalu kingorna qimaatinniartarsimagaluarpaat, aallaasinik eqqarfigalugu qamuteralannillu nipiliortitsillutik.
Tamakkuli nannup soqutigisimanngilai, savaatillillu imminnut illersorniarlutik nanoq illuminnut iserniarsarilermat aallaasariaqarsimagaat Narsami politeeq Per Christensen oqaluttuarpoq.
Narsap avataani immami ippassaani aamma nannumik pisaqartoqarpoq, piniartup nanoq pisaa illoqarfimmut tikiunneqarmat, Narsarmiut nuannattorsuusimapput.