Narsamut kokain eqquteriarneqartoq
- Ikiaroornartunik sakkortuunik taaneqarsinnaasut Kalaallit Nunaani aqqusinerni suli tunisaanngillat, politiit taama eqqissisaapput.
2003-miit 2010 tikillugu nunatsinnut ikiaroornartumik kokainimik eqqussisut paasineqartartut amerlagisassaanngikkaluarput. Allakkatigut nassiussaq kokaini 2 grammi eqquteriarneqartoq Narsami politiit maanna paasiniaavigaat, Narsami politiit pisortaat Niels Peder Krogh oqarpoq pasisaqarlutik kisianni suliaq suli naammassineqanngimmat annertunerusumik oqarsinnaanatik.
Ikiaroornartunik sakkortuunik eqqusseriarnerni paasineqartut annersaattut oqaatigineqarsinnaasoq Ilulissani pivoq. 2003-mi heroin-mik kajortumik 26,6 grammimik angut eqqusseriartoq taamani tigusarineqarpoq. Eqqusseriartoq eqqartuussisunit ukiumik ataatsimik sivisutigisumik pinerluuuteqarsimasunut inissiisarfimmiittussanngorlugu eqqartuunneqarpoq, heroin-i eqqunneqartoq nammineq eqqussisup atugassamisut eqqummagu.
2006-miit ulloq manna tikillugu kokainit eqquteriarneqartut paasineqartullu katillugit 4 grammip missaani oqimaassuseqarput.
2003-miit 2008 tikillugu ikiaroornartut eqquteriakkat assigiinngitsut ukuupput: Amfetamin, heroin kajortoq, kokain aamma ikiaroorniutit iisartakkat.
Ikiaroornartut eqqarsaatigalugit hashi politiinik ajornartorsiutaanerpaatut oqaatigineqarpoq. Ukiumut hashi arsaarinnissutaasartut suli amerlavallaaqaat, politiit oqarput.
