Narsamiit Japanimut

Narsamiit angalaqatigiit januaari naalerpat Japanip avannaanut angalalerput, tamaani issittorsuarmi naatitanik naatitseriaaseq, Kan- Jime paasisassarsiorgiartorlugu.

Angalaqatigiittussat borgmester Kiista P. Isaksenip, kommunaldirektør Ole Mølgård Motzfeldtip Narsamilu naatitsiviup pisortaata Bent Olesenip Japanimi periaaseq malillugu nunatsinni naatsitsisoqarsinnaanersoq paasisassarsiorfigissavaat.

Japanimi ukiuni arlaqalersuni iluatitsiffiusumik naatitaatiminnik naatitsinerminni nillernerpaaffissaq atorlugu kigaatsumik inerititsiartortarsimapput, taamaaliornermikkut naatinneqartut pitsaalluinnassuseq angusarpaat, taama nassuiaavoq Bent Olesen.

-Kalaallit Nunaani periaaseq taanna sungiusarutsigu, tassa naatitanik naatitsivinni ukiukkut kissaq annikinnerpaaffimmiittoq atorlugu aammalu uuliamik seqernullu kissaanik kiassaaneq annikinnerpaamiittoq atorlugu Kalaallit Nunaanut iluaqutaassaaq, Bent Olesen nangilluni nassuiaavoq.

Angalaqatigiit Japanimiinnerminni misissugassaasa ilagissavaat, tamaani issittumi naatitsivilioriaaseq.

-Japanip avannaani maanisut issitsigisarpoq, tassalu paasiniassavarput, naatitsivilioriaasiat aamma uagut Kalaallit Nunaani issuarlugu atorsinnaaneripput, Bent Olsen oqarpoq.

Aamma angalaqatigiit suliassaasa ilagaat Upernaviarsummiit angalaqatigisartik peqatigalugu Japanimiut naatitseriaasiat malillugu nalunaarsuinissaq.

-Tassa Kan –Jime malillugu Narsami misileraaniarnitsitut Upernaviarsummiut aamma misileraaniarput. Taavalu misileraanitta ingerlanerani nalunaarsukkavut malillugit peqatigiilluta periaaseq taanna atorlugu naatitsisalernissarput suleqatigiissutigisinnaavarput, Bent Olesen naggasiilluni taama oqarpoq.

Upernaviarsuk Qaqortup eqqaani savaateqarnermi naatitsinermilu misileraaviuvoq.