Narsami uuliarluertoqarpoq

Orsussaq diesel qanoq annertutigerpiarnera ilisimaneqanngitsoq Narsami imaanut kuussimavoq - diesel tipiliorsimaqaaq.
Allattoq Noah Mølgaard
aggustip 10-at 2012 07:28

Narsami uuliarluertoqarnera politiinut nalunaarutigineqarpoq. Diesel qanoq annertutiginera ilisimaneqanngitsoq imaanut kuussimavoq.

- Tankit arlaata orserneqarnerani kukkusoqarsimavoq. Tassalu diesel tankimut immiunneqartussaagaluaq maqisimavoq, Narsami qatserisarfimmi pisortap tullia Pavia Rohde KNR-imut oqarpoq.

Mingutsitsineq ullut marluk matuma siorna pisimassagatinneqarpoq. Inuit ippigilersimavaat dieselisunnersuaq illutoqqap ilisimaneqarluartup A 34ip eqqaani.

Dieseli imaanut kuussimasoq nammineq silaannarmut aalannguulluni nungussaaq.

- Qatserisarfimmi atortoqarpugut uulianut kinernerusunut soorlu motorit uuliaannut taamaallaat atorsinnaasunik. Diesel aamma benzin imerpalasuupput atortut pigisavut atorlugit katersoruminaattorujussuit, Pavia Rohde nassuiaavoq.

Narsami maanna seqinnilersimavoq taamaattumik dieselip aalannguulluni nungujartornera sukkatsissimavoq. Dieselisunnersuaq ippassarli qaangiukkiartulereersimavoq.

Politiit nalunaarutigaat suliami uani allamik pisoqaqqissanngitsoq.