Narsami utoqqaat qimarngussorneqarput
Narsami sapaatip akunnerata naanerani nunasarnerluni anorersuarmat utoqqaat illuanni utoqqaat najugallit politiinit qimarngussorneqartariaqarsimapput.
Anori ulussaarsuartut sakkortussuseqarsimavoq, misissueqqaarfimmillu ASIAQ-mit paasisavut naapertorlugit anori sekundimut meterinik 53-inik sukkassuseqarsimavoq, anorersuarlu ulussaarsuarmik taaneqassaguni sekundimut 33-nik sukkassuseqartussaavoq.
Utoqqaat illuanni najugallit qimarngussorneqartariaqarnerannut patsisaavoq, utoqqaat illuata saniani sanaartornermi tulleqqat atorneqartut teqqalermata tingittullu igalaat aserorlugit isertoorsinnaanerat aarleqqutigineqalermat.
Taamaalilluni utoqqaat ininut isumannannginnerusunut
nuutsinneqartariaqarsimapput.
Qatserisartut aamma ulapisitaasimapput.
Immap sikuata umiarsualivimmiittup tingittup ikuallattoqalersillugu kalerrisaarutit ilaata igalaartaa aserorsimavaa toorsimallugulu.
- Suut tamarmik qajannaarneqanngitsut tinginneqarput. Containerit 20 foditut angitigisut imaqanngitsut illoqarfimmi sporvognetut ingerlaarput, politeeqarfiup pisortarigallagaa Olav Nielsen oqaluttuarpoq.
Politiit sanaartornermi atorneqartartut tulleqqat ilaat 300 meterinik tingissimasut nassaarisimavaat. Politiini pisortaagallartup tamakkua 75 kiilunik oqimaassuseqassangatippai.
