Narsami utoqqaat ineeqqani ineqatigiittarput
Narsami utoqqaat illuani utoqqaat initigut atugarisaat ajorpallaartut isiginiarneqalerput. Utoqqaat ineeqqani mikeqisuni ilaatigut marlukkaarlugit inissinneqartarsimapput. Tamakku ilalernanngitsut innuttaasut ilaat oqarpoq.
- Narsami Utoqqaat Illuani pissutsit pissusissamissut inngerlanngillat. Amerlasuut ineeqqani marlukkuutaartinneqarput. Utoqqaat taama pineqartussanngillat, kisimmiissinnaatitaasariaqarput. Ammami ukioq 2005 –mimi nammineq inigisassamut,ikiortariaqalernermi nutserfissaqartoqartariaqarpoq, ilagisaasut ilaat Narsami najugalik Ingvar Rohde oqarpoq.
Ineeqqat pineqartut 10- 15 m2-sut angitigiinnarput, inunnut marlunnut najugaqarfigissallugit naatsorsuussaanngitsut. Sinifiit akorni iigaliinnarneqarsimapput. Siniffiullu appaa teqeqqumut, immaqa anartarfilerfiusussaagaluamut sikaavilerfissaasimanngikkuni inissinneqarsimavoq.
32-it Utoqqaat Illuani najugaqarput aali 29 –iinnarnut inissaqaraluartoq. Ineeqqat pineqartut ikiortarialinnut atortariaqarlersimavagut. Tamanna uagutsinnut naammaginanngilaq, Utoqqaat illuani ninguugallartoq Marie Jensen oqarpoq.
Qaammatit uuma siuliini utoqqaat utertut utinngitsullu atatsimoorlutik immikkoortuni najugaqaraluarsimapput. Kisianni oktober qaammataa aallartilaartoq, nuna tamakkerlugu nakorsaanerup utoqqaat illuanik aqutsisut peqquai, immikkoortoq ataaseq marlunnik quleriiusoq matusariaqarpoq, ikuallattuulinnginnermi qimaaffissiaqanngimmat. Tassami najugaqartut nutsertariaqalersimapput, tamatumalu kinguneraa utoqqaat ilai marlukkaarlutik najugaqatigiilernerat.
- Immikkoortumi nutaajunerusumi utertyt 9 –at ataatsimoortillugit nuutsippagut,. Tamanna sulisunut oqiliallaataavoq. Kisisanni aamma sulisut atugaat ajorput. Anartarfeerannguaq ataasiinnaq sulisut 29 –usut tamakkiummassuk, Marie Jensen oqarpoq.
Narsami Inunnik Isumaginninnermi ataatsimiititaliap siulittaasua Niels Egede oqarpoq.
Piaartumik utoqqarnut nuuttussanik utaqqisoqarlutik. Utoqqallu Illuat mikivallaalermat, piaarnerpaaq atorlugu Namminersornerullutik Oqartussat saaffigineqassasut, Utoqqaat Illuliornissamik isumaqatigiinniarfigalugit.
