Narsami uranisiorfissaq borgmesterip tullersortaata akerleraa

Narsami borgmesterip tullersortaa uranimik piiaanissap oqalligisineqarneranut ilannguppoq. Piiaavissatut piukkunneqartoq nunatsinni uraneqarnerpaatut ilisimaneqarpoq, borgmesterilli tullersortaata Aqqaluaq Egedep illoqarfiup uranimik tunisassiornissaa kissaatiginngilaa.

Landskarsi aningaasanik ulikkaartoq kalaallillu 100-t sinnerlugit suliffillit - nunatsinni uran nunanut allanut tunisassiarineqaleraluarpat siunissami takorluukkat neriunarluarput – atomimik nukissiornermi urani ilaatigut atorneqartarpoq.

Aatsitassanut Naalakkersuisup Jørgen Wæver Johansenip Narsap eqqaani Kuannersuarni uranip tunisassiarineqarnissaa takorloorpaa. Nunat uranimik tunisassiortartut allat, soorlu Canada aamma Australia peqatigalugit tunisassiornissaq takorloorneqarpoq.

Narsamili borgmesterip tulliata, IA-meersup, Aqqaluaq Egedep tamanna ilalernartinngilaa.

- Uranip sumut atorneqarnissaa ilisimaneqanngikkallartillugu akerliuvunga. Ilisimanngilarput urani atominik sakkussatut atorneqassanersoq. Nunatsinniillu uranimik avammut tunisassiornerput avataanit isiginerlunneqaatigilersinnaavarput. Uran pillugu misissueqqissaarnissaq ajorinngilara, sumulli atorneqarnissaa siullertut paaserusuppara, Aqqaluaq Egede oqarpoq.