Narsami tunisassiat nutaat

Narsami Royal Greenlandip raajaleriffikuani sulisut soraarsitat, timip sulinermi atornissaa eqqortoq pillugu pikkorissartinneqarnermik saniatigut Neqi A/S-ip savaaqqat neqaanik tunisassiaanik nutaanik tunisassioqataatinneqalersimapput.

Inuussutissalerinermi Ilinniarfik , Inuili, Neqi A/S-ilu suleqatigiillutik ukioq Inuussutissanik Ineriartortitsinissamik isumasioqatigiinnermi isummiussat aallaavigalugit pikkorissartitsisoqartoq, Neqimi tunisassiornermi pisortaq, Henning Sønderup, oqarpoq. Maannamut tunisassiat nutaat sisamat pikkorissartunit naammassineqarsimalerput.

Henning Sønderup aperineqarpoq, tamakku tunisassiat nutaat Inuussutissalerinermi nutaaliornissaq tunaartaralugu ukioq isumasiortitsisoqarmat ineriartortitsinissamik isumassarsiat ilagisimaneraat. Angerpoq oqarluni, soorunami tassani isumasiortitsinermi isumassarsianik pissarsiortorsimallutik, aamma illuatungaatigut namminneq isumassarsianik tunioraasimallutik, taamatullu isumasiortitsisimaneq qujanartuunerarpaa. Isumassarsiat taamanikkut ilagaat inuup malugissusai aallaavigalugit tunisassianik pilerinarsaarisoqassasoq, tassalu mamartulianik takujuminartunillu tunisassiortoqassasoq.

-Oqarluarsinnaavunga tamakku tamaasa maannakkut nutaanik tunisassiornitsinni malissimagivut, Henning Sønderup oqarpoq.

Inuit katillugit 48-t pikkorissartinneqarlutillu nutaanik tunisassiortinneqassapput. Narsamilu Neqi A/S savaaqqanik savanillu sapaatip akunneri sisamat qaangiuppata toqoraalerpat maannakkut pikkorissartinneqartut suleqataalersinneqassapput.