Narsami terianniaq angalaannartoq pisarineqarpoq
Narsami teriannissamik illoqarfiup iluani angalaartumik ullaap tungaa pisaqartoqaqqippoq.
Narsami politiit ittuat Ib Lennert Olsen oqaluttuarpoq ullaaq arfineq-marluk missaanni nalunaarfigitissimallutik terianniaq illoqarfiup iluani angalaartoq takuneqarsimasoq.
Narsap Kommuniani qimminik toqoraasut akunnerit pingasut terianniaq malersoreerlugu qulit missaanni pisarisimavaat.
- Ilisimanngilarput terianniaq perlerortuusimanersoq, kisianni naatsorsuutigineqarsinnaavoq teriannissat nappaalanerannik pissuteqartumik piffissami kingullermi terinnissat illoqarfimmi angalaartalernerat. Nalinginnaasuunngikkaluarpormi illoqarfimmi teriannissat angalaartarneri, Ib Lennert Olsen oqarpoq.
Sapaatip-akunnerata kingulliup ingerlanerani Narsami qimmit marluk eqqumiitsumik pissusilersoreerlutik namminneerlutik toquinnareernerisa kingorna Narsami annilaangatigineqalerpoq qimmit perlerornermik nappaalalersimanissaat, taamaattumillu qimmit angalaannartut tamarmik inuttassarsiunngivillugit kommunimi sulisunit toqorarneqartarput. Narsap illoqarfiani maannamut qimmit angalaannartut 15-it toqunneqareerput.
Ib Lennert Olsen oqarpoq Narsami uumasuutillit mianersornerusariaqartut.
