Narsami suliffissuaq akissarsiffinni matoqqasalersinnaavoq
Narsami suliffissuaq akissarsiffinni matoqqasalersinnaassasoq, suliffissuarmi pisortap Sermitsiamut apersorneqarnermini oqarpoq. Illoqarfinni allani suliffissuarni akissarsiffinni ajornartorsiutaasarnikuuvoq Royal Greenland-illi suliffissuarni sulisunik pikkorissartitsisalernera sulisut aalaakkaanerulernerannik kinguneqarsimavoq.
Narsami apriilip naanerani suliffissuaq sulisunik 55-nik amigaateqarsimavoq, suliffissuarmiillu kommunimut saaffiginnittoqarmat taamaallaat arfineq pingasut suliartorsimallutik.
Suliffissuup akissarsiffinni qaammatillu naanerini matoqqasarnera, suliffissuarmi pisortap Elias Didriksen-ip Sermitsiami kingullermi saqqummersumi apersorneqarnermini oqaaluttuaraa, isumaqarporlu suliffissaaleqisut suliffimmut naaggaaraluarlutik ikiorsiissutinik pisarnerat Narsami suliffissuarmi ajornartorsiutit qiterigaat.
Narsap kommuniani isumaginninnermi siunnersortaanerugallartoq Kiista P. Isaksen oqarpoq, Royal Greenlandi ulloq ataaseq sioqqullugu sulisussanik pissarsiniartarnera ajornartorsiutaanerusoq.
-Royal Greenland-I kommunimut sianertarpoq sulisussarsiorluni, namminneq sulisutik atorfeqavissut suliartunngitsooraangata, Kiista P. Isaksen oqarpoq. Ilanngullugu oqaatigaa, suliffissaaleqisut suliffissuarmut suliartorneq ajornerminnut peqqutit ilagigaat ulloq ataasiinnaq sulitinniarneqartarmata.
Suliffissuarni ”Ineriartorta”mik taallugu Royal Greenland-i suliffissuarnik sulisunik pikkorissaasarput iluatsilluartumik. Pikkorissaanerit suliffissuarni sulisut suliffimminnut aalaakkaanerulernerannik kinguneqartarpoq.
”Ineriartorta”mi ingerlatsinermi aqutsisuusoq Hans Broe oqaluttuarpoq, suliffissuarni sulisut pikkorissarsimagaangamik suliffissuit naammassisaqarnerusartut.
-Isumaqarpunga arlalinnit iluaquteqartoq. Pikkorissarnerni inuk qitiutillugu sammisarparput inuillu akornanni suleqatigiinneq aamma sammisarlugu. Taanna iluaqutaanerpaasarunarpoq, inuit pikkorissarneqartut inuunerminni artorsaateqarnikuusarmata. Pikkorissarsimagaangamik inuunerminnut qaamanerusumik isiginnilertarput, nukissaqarnerulertarlutillu, Hans Broe oqarpoq.
Majip naanerani Narsami suliffissuarmi sulisut sapaatit akunneri pingasut “Ineriartorta”-mit pikkorissartinneqassapput.
