Narsami suliffissaaleqisut pikkorissarput

januaarip 10-at 2007 06:19

Narsami sivisuumik suliffissaaleqisut 21-t, sapaatip-akunnerini arfineq pingasuni inuttut ineriartornermut pikkorissartitsinneqarsimanerat, Narsap Kommuniata inunnik isumaginninnermut immikkoortoqarfiani sulisunit malugilluarneqarsimavoq.

Pikkorissaqataasut arlaqartut sulinissaminnut assut kajuminnerulersimapput. Ataaseq, suliffissaqaqqilernissamut sungiusarneq aqqutigalugu suliffittaarsimavoq. Aamma alla periarfissaq taanna aqqutigalugu sulilerumalluni qinnuteqarsimavoq.

Pikkorissartut atuartinneqarnerminni aqqusaarsimavaat suliffissaqartitsiniarnermi pissutsit, timikkut anersaakkullu peqqissuuneq, upperisaq qinunerlu, eqimattakkuutaarluni qarasaq atorlugu sungiusarneq kiisalu nerisassiat sapernanngitsut peqqinnartullu.

Atuartitsinermi tunulequtaasut tallimaapput: Ilisimasaqarneq, kulturi, anersaakkut nukittussuseq, nukissanik peqarnissaq ataatsimoornerlu.

Pikkorissartut decembarip 29-anni pikkorissarsimanerminnut uppernarsaammik Diplomimik tunineqarput.

-Peqataasut paasinnissinnaassusaat qaangerlugu atuartinneqarnissaat pingaartinneqarsimavoq, kulturikkullu ileqqorissaarnissamut naleqassuseq ataatsimoorlutik oqaatigisinnaanngussagaat anguniarneqarsimavoq. Tarnip pissusiinik ilisimatooq Narsamilu Multicenterip atuarfiani aqutsisoq Ernst Peilmann oqarpoq.