Narsami savaaqqanik toqoraavik nutaamik pisortaqalerpoq
Taassuma maannamut toqoraavimmi pisortaq Henning Sønderup soraarninngulersoq taarsertussanngorpaa.
Kunuk Albrechtsen savanik toqoraavimmi pisortaareersimavoq, tassami 1986-imit 1991-imut Narsami Royal Greenlandip tunisassiorfiani pisortaasimagami, soorlu aamma Paamiuni Royal Greenlandimi pisortaasimasoq. Tamatuma kingornagut Royal Greenlandimi qaffasissumik atorfeqartarsimavoq, soorlu Tunisassiornermut Kilisaatinillu aqutsisoqarfimmi pisortamut tulliusimalluni, soorlu aamma Polar Seafoodimi atorfeqarsimasoq.
KNI-mi pisortaagallartup Peter Grønvold Samuelsenip, Kunuk Albrechtsenip toqoraavimmi pisortatut atorfininnissaminut akuersisimanera nuannaarutigaa:
- Narsami Neqi A/S-ip savaaqqanik toqoraavia KNI-mit 60 millionit koruunit atorlugit nutarterneqaqqammerpoq, taamaalilluni EU-p inuussutissanik tunisassiorfinnut piumasaqaatai sakkortoqisut naammassisimallugit. Neqi A/S taamaalilluni Kujataani nunaateqarnermit tunisassiat anertusarneqarnerini, savaatilinnut aamma inuiaqatigiinut iluaqutaasumik pingaarutilimmik inissisimalissaaq, tassami imminut pilersorneq annerusoq pilersikkaanni tamanna iluaqutissartaqarmat, Peter Grønvold Samuelsen KNI-mi pisortaanerugallartoq Neqillu siulersuisuini siulittaasuusoq taama oqarpoq.
Kunuk Albrechtsenip atorfittaassani aamma merserinngilaa.
- Inuussutissalerinermik misilittagaqarluarpunga, tamannami toqoraavimmut ingerlalluartumut pingaaruteqarmat. Qallunaat EU-llu misissuiartortitai ataasiarnanga peqataaffigisarsimavakka qaammaasaqarfigilluarlugillu, Neqi A/S-imi pisortanngortussaq upernaap ingerlanerani sulilersussaq taama oqarpoq.