Narsami puisit amiinut tunitsivik nutaaq
Narsami innuttaasut marluk puisit amiinut tunitsivimmik namminersortumik Great Greenlandimullu unammillertussamik pilersitsipput.
Tamanna avisimi Sermitsiami allaaserineqarpoq.
Tunitsivimmik namminersortumik Narsaq Marine Productimik atserlugu pilersitsisuupput Carl Egede Høegh aamma Ole Jørgen Davidsen.
Taakku naatsorsuutigaat piniartut ameerutaannut Namminersornerullutik Oqartussat tapiissutaat Narsami tunitsivittaassamut ameernermi aamma atuukkumaartoq.
Narsaq Marine Productimut ameerneq Great Greenlandimut ameernermit 20 koruuninik akigissaarnerussaaq, pilersitsisullu neriupput amernik 10.000-inik ukiumut tigooqqaasarumaarlutik.
Narsaq Marine Productimik ingerlatsisup aappaa Ole Jørgen Davidsen, Great Greenlandimi tunisisitsisartuusimagaluarpoq, Great Greenlandilli amerpassuarnik eqqagaanik videoliaminik KNR TV-kkut saqqummiussinini pissutigalugu suliffeqarfissuarmi iluarineeruppoq soraarsitaallunilu.
Great Greenlandip siulersuisuini siulittaasoq Anders Brøns Sermitsiamut oqarpoq Narsami taama unammillerteqalersimanertik tusaatissatut tiguinnarsinnaagitsik.
