Narsami politiit qimmiutilinnut mianersoqqusipput ippassaq ullaakkut terianniamik illoqarfiup iluani angalaannartumik pisaqareerlutik.
Terianniaq pisarineqartoq perlerortuusimanersoq ilisimaneqanngilaq; niaquali misissugassanngorlugu Danmarkimut nassiunneqareersoq, Narsami politiit ittuat Ib Lennert Olsen nalunaaruteqarpoq.
- Terianniaq illoqarfiup iluani akunnialuit angalaarsimasoq paasivarput, uagullu arfineq pingasunngoreersoq nalunaarfigitinnitta kingorna akunnerup affaa sinnerlugu malersoreerlugu aallaallugu pisaraarput, Ib Lennert Olsen oqarpoq.
Ib Lennert Olsen-ip oqaatigisinnaannginnerarpaa terianniaq perlerortuusimanersoq; kisiannili terianniap meeraq atuarfiup eqqaani pinnguartoq tunuaniit pississaarfigigaa takuneqarsimavoq.
- Terianniaq perlerortuusimanersoq oqaatigisinnaanngilara. Meeraq atuarfiup eqqaani pinnguartoq qaninngooramiuk kiisimanngilaa; kisianni teriannissat illoqarfimmi angalaartut nalinginnaanngimmata qimmiutillit maleruagassanik malinneqqullugit; tassalu qimmiminnik qileruserlugit paarsinninnissaannik kajumissaarpavut, Ib Lennert Olsen oqarpoq.