Narsami persuttaanerit amerliartorput
Narsami persuttaanerit politiinut suliassanngortinneqartut ukiup matuma aallartinneraniilli maannamut siorna ukioq naallugu nalunaarutigineqartut amerlaqatigilereerpaat, taama Narsami politeeqarfimmi pisortaq Niels Peder Krogh ilisimatitsivoq.
Maajiinnarmi peqqarniitsumik annersaanerit sisamat nalunaarutigineqarput, ataaseq Nuummut aallarunneqartariaqarsimavoq, ima annersagaatigalunilu isimmitsagaatigisimagami allaat inalugai putusimallutik.
- Angut persuttaasoq 52-inik ukioqartoq eqqartuussisunut sassartinneqareerpoq, tassanilu qaammatini arfineq-pingasuni pinerluuteqarsimasunut inissiisarfimmiittussanngortinneqarluni.
Pisimasumi allami inuit arlallit erngutsillugit, angut ujarassuarmik niaqqumigut angummit allamit anaaneqarpoq. Angut 67-inik ukiulik sakkortuumik persuttaasimasutut qaammatini arfineq-pingasuni Pineqaatissinneqarsimasunut inissiisarfimmiittussanngortitaavoq.
Pisimasut pingajuanni angut 42-nik ukiulik arnamut sakkortusaarsimasutut ullumi eqqartuussisunut sassartinneqassaaq. 42-nik ukiullip arnaq toqqusassisimavaa aagialittuinnanngorlugu.
Arnamik toqutseriarsimasumik aamma pineqaatissiisoqarpoq. Arnap inooqatini savimmik maajip sisamaani kapisimavaa.
Aamma Qaqortumi persuttaanerit politiinut nalunaarutigineqartut amerliariarpiloorsimapput, ukiup matuma qaammataani sisamani siullerni 40 procentimik amerleriarsimagamik.