Narsami nerisassat pillugit isumasioqatigiittoqassaaq
Kommune Kujallermi inuussutissarsiornermut ataatsimiititaliap siulittaasuata Kalistat Lundip oqarnera naapertorlugu inuussutissat pillugit isumasioqatigiinnermi Kujataata Kalaallit Nunaanni nerisassanut peqqumaasivinngortinnissaannik kissaatigisaq malunnartinniarneqarpoq.
- Kujataata tamaasa pigai: Aalisarneq, savaateqarneq nunalerinerlu. Kujataa kalaallit nerisassiassaannik ulikkaarpoq. Taamaattumik pissusissamisuussaaq INUILI aallaaviliullugu Narsap nerisassanut qitiusunngortinnissaa, Kalistat Lund oqarpoq.
Taanna aamma isumaqarpoq Kommune Kujalleq inuussutissanut nakkutilliivinngortinneqartariaqartoq, Namminersorlutik Oqartussat nakkutilliineq Danmarkiminngaanniit tiguppassuk.
Kalaallit Nunaata aningaasaqarneq pitsanngortissappagu pingaaruteqarpoq nunatsinni tunisassiatta pingaartinneqarnissaat tuniniaanerullu patajaallisarneqarnissaa, taamaalilluta avataaniit eqqussukkat annikillisarneqassammata suliffissanillu amerlanerusunik pilersitsisoqassalluni. Anguniagaq unaavoq aningaasartuutit ikilisinnerisigut inuussutissat unammillersinnaasunngortinnissaat, tamatumanilu pingaartuuvoq nukissiorfinnik allanik periarfissaasinnaasunik misissuinissaq, tassami nukissiorneq tunisassiortumut tunisassiornermi aningaasartuutit annerpaat ilagimmassuk, tassa taama Kommune Kujallermi inuussutissarsiornermut ataatsimiititaliami siulittaasoq oqarpoq.