Narsami napparsimasup toqqutaa paasiniarneqarpoq

januaarip 07-at 2005 10:36

Narsami ungasinngitsukkut inuit marluk napparsimallutik peruluttut napparsimmavimmut unitsinneqarput, peruluttullu aappaata katsorsarneqaraluarluni nappaanni toqqutigaa.

Inuit napparsimarulullutik Narsap napparsiammavianut ungasinngitsukkut unitsinneqartut nappaataannut, tuniluuttumik qaratsap ameraasaanik aseruuttoortarnermik napparsimalersitsisartoq bakteria imaluunniit bakteria alla, tassa tamatigut puakkut aseruuttoortitsisartoq aallaaviusimasinnaasut, Narsami nakorsaaneq Kent Kleinschmidt ilisimatitsivoq. Taamaattumillu Narsami illoqarfiani innuttaasut neqeroorfigai 38,5 sinnerlugu kissarneqarunik napparsimmavimmut saaffiginneqqullugit.

Narsamilu nakorsaanerup innuttaasunut taama saaffiginninnera ulluni kingullerni napparsimmavimmi suliassaqartitsilluarsimavoq. Nunatsinni nakorsaaneq Knud Brinkløv Jensen oqarpoq Narsami innuttaasut nakorsiarluarsimanerisa taamaalilluni napparsimarulullutik unittussat amerlisinnaanerat pinaveersimatikkaa.

Nunatsinni qaratsap ameraasaanik aseruutsitsisartunik bakteriamik pneumokok-eqalersarneq takornartaanngilaq, akiuussutissatigullli aamma periarfissaqarluarpoq, taamaattorli napparsimanermi kiaqaraanni nakorsiajaarnissaq pingaaruteqarluinnartuusoq nunatsinni nakorsaaneq erseqqissaavoq.