Narsami multicenteri misissuiffigineqassaaq

Naalakkersuisut ukiut arlallit matuma siorna kissaatigaat nunatsinni suliamik ilinniagaqarsimanngitsut 6-7.000-t qanoq iliuuseqarfigineqassasut.

Narsami ulluunerani atuarfik, Multicenter, Namminersornerullutik Oqartussanit maanna misissuiffigineqariartulerpoq.

Tassani inuit 21-t suliffissaqartitsinermi pissutsinik, timikkut anersaakkullu peqissuunermik, qarasaq atorlugu sungiusaqatigiinnernik, upperisamik qinunermik peqqinnartunillu nerisaqarnermik pikkorissartinneqaqqammerput.

Søren Stach, Sulisoqarnermi Pisortaqarfimmi piginnaassutsit aallaavigalugit sulianik pilersaarusiortartoq, ullumi kujammukalersoq ima oqarpoq:

- Ilisimasaqarluartut Danmarkiminngaanniit tikiseriarlugit pikkorissaatitsinernik siornatigut ingerlatsisittarpavut, uanili imaaliorpugut, nukiit pioreersut atorluarlugit pikkorissartippavut, tamannartaa soqutiginartorujussuuvoq, Søren Stach oqarpoq.

Nangillunilu oqarpoq, pikkorissarsimasut Narsamiinnerminni naapissagitik, paasiniassagamikku pikkorissarsimanertik qanoq nalilerneraat, pikkorissaasimasullu aamma oqaloqatigiumaaritik.

Kujataani angalanermini Sofus Martens ilagalugu Nalunami kuultisiorfik aamma tikeraassavaa.